Жоллагъа, кёпюрлеге да къаралады

КъМР-ни Транспорт эмда жол мюлк министерствосундан билдиргенлерича, алты жылны ичинде республикада жолланы  1811 километр чакълы  бири  мардалагъа келиширча болгъанды.

Быйыл "Къоркъуусуз эм тынгылы автомобиль жолла" миллет проектге кёре Майский-Заречный-Ново-Ивановское жолда  эм Огъары Малкъарда  Мухол микрорайоннга ётген кёпюрле хайырланыргъа берилгендиле. Ала экиси да   Черек сууну   юсю бла барадыла эм уллулукълары 90 эм 33 метрге жетеди.

Эки сооруженияда да жолланы игилендирирча эм къоркъуусузлукъ  жалчытылынырча мадар этилгенди. Ол санда  кече жарыкъ болурча чыпынлы чыракъла да салыннгандыла.

Аны бла бирге Терекде,  Куба-Таба-Огъары Куркужин жоллагъа эм Нальчикде  Осетин орамны  2-чи Таман дивизия орамгъа  дери кесегине да  тынгылы ремонт этилгенди. Саулай алып айтханда, быйыл 120 метр чакълы бир  кёпюрге къаралгъанды.

Андан сора да, быйыл  он  кёпюрню къурулушу барады. Аланы тогъузусу  Экинчи Чегем-Булунгу жолда орналадыла.   Бусагъатда аланы бешисинде неда 112  метр тенгли бирде  ишлени кёбюсю этилгенди. Дагъыда тёртюсюнде   тийишли жумушла жылны ахырында башланырыкъдыла.  Мында да   102 метр тенгли бирни жангыртыргъа керек боллукъду.
 

Кёк - Таш бла Чегем сууланы кёпюрлери "Къоркъуусуз эм тынгылы автомобиль жолла" миллет проектге кёре жангыртыладыла. Башхалагъа уа  регионну жол  фондундан ахча  бёлюнюрюкдю.  
 

Бусагъатда Майский-Урожайное жолда  Терек сууда кёпюрге тынгылы ремонт этиле турады. Аны кезиуюнде  162 метр тенгли бирде кёпюр эм жол да  жангыртыллыкъды. Жол фондну ахчасына  болжаллы халда кёпюр ишлене турады, ол битсе, эски кёпюрню чачып тебирерикдиле.