Гитчиликлерин кёргюзтгендиле

Нальчикде «Жаш дзюдочу» деген эришиу бардырылгъанды. Анга республиканы жер-жерлеринден 2014–2015 жыллада туугъан жюз сексен спортчу къатышхандыла.

Бу эришиу жаш спортчулагъа къарыуларын республикада даражада сынаргъа онг бергенли тёрт жыл болады. Аланы жыл санлары ондан кёп тюйюлдю, кеслери да он ауурлукъ къауумда тутушадыла.

Къабарты-Малкъарны дзюдодан бла самбодан олимпиада резервли спорт школуну башчысы Сафарби Таов айтханыча, сермешле экишер минут бардырыллыкъдыла, быллай жыл санда андан кёп заманны тутушургъа жарамайды. Болсада, ала сейирлик тюбешиуле кёргюзтюрлерине ишеклик жокъду, кёплени усталыкълары, мен кёргенден, иги да  бийикди. Болсада, ала сабийле болгъанларын унутургъа жарамайды, ол себепден аланы кёллери къачмазча этерге тийишлибиз, дегенди ол.

Кертиси бла да, быллай эришиулени бардырыуну баш мураты гитче дзюдочулагъа сынам жыяргъа, низамгъа юйренирге болушургъады. Тренерлерини  башчылыкъларында уа ала усталыкъларын, хорламгъа итиниулюклерин да толу ачыкълайдыла. 

Къабарты-Малкъарны спорт министрини орунбасары, Спортуну халкъла аралы устасы Аналаны Аслан чертгенича, жарау бардыргъанда сабийлеге эришиулеге къатышыу жаны бла сынам алдырыргъа керекди.

- Биз да гитче спортчулагъа аллай онг беребиз. Ала бийик усталы тренерлени къолларында юйренедиле, эришиулеге билимли судьяла чакъырыладыла, эришиуле уа бийик даражада къураладыла. Ол а ёсе келген тёлюлеге ахшы юлгюдю, аны хайыры бла ала гитчеликден да жараулагъа нек жюрюгенлерин анылайдыла, - дегенди Ана улу.  

Эришиуле бир жолгъа юч татамиде бардырылгъандыла. Бу жыл санда спортчула сермешни бардырыуну жорукъларыны юслеринден сагъышланмайдыла, аланы муратлары бирди – хорларгъа. Жараулада юйреннгенлерин къайтара эм къыйын халладан чыгъаргъа кюрешедиле.

Аланы кёбюсю дзюдо бла эки-юч жылны кюрешедиле. Бу аланы уллу спортха биринчи атламларыды. Спортха эм гитче замандарындан келгенле да бардыла. Хорлагъанла уа кубокла, майдалла эм грамотала бла саугъаланнгандыла.