Усталыгъы, сабырлыгъы бла да намыс тапханды

Бёзюланы Мухамматны къызы Фатимат корректор болуп ишлеп башлагъан эди «Заман» газетде. Андан а  газетни жамауат-политика жашау бёлюмюню редакторуна, артда уа «Кабардино-Балкарская правданы» баш редакторуну орунбасарына дери ёсгенди.

Ол  онунчу классны Хабазны орта школунда бошагъанды. Орус тилден экзаменледе кесигиз сюйген темагъа сочинение жазыгъыз дегенлеринде, Фатимат «Жашауда кимге ушаргъа сюесе» деген теманы сайлагъанды. Эпиграфха уа Николай Тихоновну назмусундан «Гвозди бы делать из этих людей, не было бы крепче в мире гвоздей» деген тизгинлени алгъанды. Аны тил байлыгъына, суратлау сёзню уста хайырланнганына, сочиненияны терен магъаналылыгъына устазла бийик багъа бичгендиле, районнга жиберирге оноулашхандыла.

Залукокоажени орта школунда онунчу классны жыйып, аны сочинениясын окъугъандыла. «Бу очеркди», – дегенди орус тилден окъутхан устазладан бири. Баям, журналистикадан ангылауу болгъан адам болур эди. Фатимат а «очерк» деген сёзню ма ол заманда эшитген эди. Биринчи материалы уа врачны юсюнден болгъанды. Газет окъуучула телефон бла сёлешип махтагъан эдиле, ыразылыкъларын билдирген эдиле. 

1983 жылда уа Пицундада очеркле жазгъанланы битеусоюз семинарлары бардырылгъанды. Бизни республикадан ары экеуленни жибергендиле – Бёзюланы Фатиматны бла Ирина Мезованы. Бизни къызланы жазыу ишлери 43 адамны ичинде бек игиге саналгъандыла. Белгили жазыучу Анатолий Ананьев а былай айтхан эди: «Таза орус тилигиз ючюн сау болугъуз. Бу къызла орусча оруслуладан эсе иги жазадыла».

Ол сёзле айтылгъандан сора, къызла къайсы миллетден болгъанларын билирге сюйгенле чыкъгъандыла. Фатиматны сыфатына, сёзюне, кесин къалай жюрютгенине да эс буруп, семинаргъа къатышханладан бири: «Мен Бозиева къайсы миллетден эсе да, аны сайларыкъ эдим», - дегенди.

Фатимат «Заман» газетни жамауат-политика жашауну бёлюмюне бир талай жылны башчылыкъ этип тургъанды. Биргесине Теммоланы Мухадин бла Къулбайланы Алий ишлегендиле. Ма ол бёлюмден баргъан материаллагъа баш редактор Атталаны

Жамалдан хазна тырман эшитилмегенди. Ол а Фатимат кесине буюрулгъан ишни жууаплылыгъын терен сезгенин, материалны «чийлей» жибермегенин кёргюзтген шартды.  
«Мен Фатиматны башчылыгъында талай жылны бир кабинетде ишлегенме. Ол кесини иш кёллюлюгю бла башхаладан да жууаплылыкъны къаты сурагъанды, излегенди. Терен билимли, ишден арый-тала билмеген журналист эди», - деп эсгереди

Фатиматны юсюнден Теммоланы Мухадин. 
Кесин чынтты журналистге санагъан адам кёп затны билирге керекди, озгъан заманланы эмда бюгюннгю жашауну юсюнден да. Фатимат къыралда, андан тышында да бола тургъан ишлени юслеринден дайым хапарлы болургъа итиннгенди, алайсыз жарамазлыгъын иги ангылап. Кесини оюмун да айтмай болалмагъанды. Америка Югославиягъа бомбала атханында, ол «Кюйсюзлюк кюйсюзлюкню туудурады» деген статьясында кёз къарамын билдиреди.  

Адетлерибизни, тёрелерибизни сакълауну темасына да Бёзюланы къыз уллу эс бургъанды. «Намыс бла согъулгъан тау адет» деген аты бла басмаланнган материал окъуучуларыбызны сагъыш этдирген эди. Ала аны телефон бла сёлешип, редакциягъа да жазып билдиргендиле.  

Дин бла байламлы тема да аны чыгъармачылыкъ ишинде кесине жер тапхан эди. Ол, иймамла бла байламлыкъ жюрютюп, оразаны, къурманны, ёлгенни асырау бла байламлы адетлени юслеринден ушакъла бардыргъанды. «Дин бузмайды адамланы, адамла бузадыла динни» деген статьясын окъугъандан сора, газетни алыргъа унамай туруучу биреу «Заманнга» жазылып башлагъанын айтхан эди.

«Газетге ишлерге келген биринчи жылындан башлап аны къылыгъында тюрлениу эсленнгенди деп, айталлыкъ тюйюлме. Корректор болгъан заманындача къалгъан эдиле жууашлыгъы, артыкъ сёлешмегени да. Газетде ишлеген хар журналист – юйретиучюдю. Публицистика статьяда, очеркде, хапарда, корреспонденцияда насийхат магъана жокъ эсе, ала керексизине айтылгъан сёзле болуп къаладыла. Фатимат анга терен тюшюннген эди эмда эсден чыгъармагъанды.  Фатиматны юсюнден ариу сёз не къадар кёп айтылса, артыкъ боллукъ тюйюлдю. Биз аны эгечибизден башха кёрмегенбиз»,- деген эди Къулбайланы Алий да, Фатиматны эсгере.