Жаш адамланы бирикдирир муратда

КъМКъУ-ну медицина академиясыны студенти Къулийланы Аслан “Шум.Блогинг. Производство”  деген билим бериу программагъа къатышып, кесини чыгъармачылыкъ проектин жашаугъа келтирир ючюн, грант къытханды.

 Асланны, айтхылы поэт Къулийланы Къайсынны хурметине атап, “Мамырлыкъ, къууанч сизге, саула” деген ат бла, документли фильм алдырыр мураты барды.

-Мени бу проектде хорлагъанымы юсюнден хапар закий поэтибиз Къулийланы Къайсынны туугъанына 107 жыл болгъан кюн келгени бошдан болмаз. Бу жумуш жаш тёлюбюзню кеслерини миллет тёрелери бла адетлерин окъуп, терен билип, сакъларгъа итиндирир деп, бек ышанама, дегенди Аслан кеси хорлаууну юсюнден.

  Къабарты-Малкъар Къырал университетни студентини проекти 700-ге жууукъ жаш адамны,14-ден 35-ге дери жыл санларында болгъанланы, школчуланы, вузланы бла колледжлени студентлерин, тири жамауатны, Къайсынны чыгъармачылыгъыны дуниясына къатышып, билимлерин ёсдюрюрге онг табыуда бирикдирикди.