«Регионну экономикасы»: туристлени саны кёбейтеди

Россейни Банкыны алгъаракъда басмаланнган «Регион экономика» докладында  къыралда арт кезиуледе болгъан тюрлениулени, болумну юсюнден кёп шарт келтириледи. Анда жашау журт-къурулушну, багъаланы, урунуу рынокну, ипотеканы, адамланы къолайлыкъларыны эмда башха затланы юсюнден айтылады, ол санда туризм инфраструктура не халда болгъаны эмда экономикагъа этген къошумчулугъу ачыкъланады. Алай бла Къыбыла эмда Шимал Кавказ регионлагъа солургъа келгенлени саны  бир кесек  азайгъанлыкъгъа, алыкъа да  уллуду, дегендиле  финанс учрежденияны Къабарты-Малкъарда бёлюмюнде. Анга уа, докладда айтылгъаныча, кюнню халы иги болгъаны эмда автотранспорт инфраструктура айныгъаны себеплик этгендиле.

Дагъыда жер-жерледе курортла ишлерин жылны  бир кезиую бла чеклендирмей, башха заманлада да солургъа онг берирге кюрешип башлагъандыла – ол да ёсюмге себеплик этген шартладан бириди. Сёз ючюн, Къабарты-Малкъаргъа жайда солургъа сюйгенле кёп келедиле; ала таулагъа чыгъадыла, тау этекледе жолоучулукъгъа атланадыла. Къыш а лыжалада учаргъа сюйгенлеге аламат кезиудю.

Саулай алып айтханда, быйыл ал тогъуз айны ичинде Къабарты-Малкъарда 1,5 миллион турист болгъанды. Ол былтырны кёрюмдюсюнден 17 процентге асламды. Аладан кёп къалмай бир миллиону Минги тауну этеклеринде солугъандыла. Бу шартланы КъМР-ни Курортла эмда туризм министерствосунда туура этгендиле.

Юйюр туризм да иги атламла бла айнып барады. Сёз ючюн, Нальчикде озгъан айны аллында ётген гастрофестивальгъа кёп къалмай 50 минг адам келген эди. Тышындан къонакъланы асламысы  бу регионладан эмда шахарладан эдиле: Москва, Краснодар край, Ставрополье, Шимал Осетия эмда Татарстан. Тыш къыралладан келгенле да болгъандыла, асламысында  Къытайдан.