Электрокючню юсюнден гитчеликден билирча

РусГидро компанияны Къабарты-Малкъарда бёлюмю бу кюнледе Нальчикде маданият айнытыу Арада ачыкъ дерс бардыргъанды. Анга жарым жюзден артыкъ школчу къатышханды. Сабийлеге энергияны аяуну юсюнден Аслан Кашежев хапарлагъанды.

Аслан «2022 жылны Устазы» битеуроссей конкурсну лауреаты болгъаны бла белгилиди. Ол не къыйын теманы да ангылашынырча айта биледи. Сабийлеге ол электрокючню, ток бла ишлеген приборланы къоркъуусузлу хайырланыуну, энергияны аяуну юслеринден кёп магъаналы зат айтханды.

«Бу дерс къуру лекция болуп къалмай, энергияны тамашалы дуниясына жолоучулукъ болгъанды», - дегенди школчу къызчыкъ Марина.

Ызы бла гитче къонакълагъа викторина бардыргъандыла. Анга ала бары да бек сюйюп къатышхандыла. Хорлагъанланы уа компанияны атындан китапла бла саугъалагъандыла. Ала орта эмда гитче жыл санлы школчулагъа деп жарашдырылгъандыла, кеслери да сатыуда болмаучудула, жаланда китапханалагъа бериледиле.

«Энергиягъа аяулу кёзден къараргъа кереклисини юсюнден билимни ёсе келген тёлюге бералгъаныбызгъа къууаннганбыз. Сабийле шёндюден окъуна тёгерекдеги къудуретге абери эталлыкъларын ангылагъанлары магъаналыды», - дегенди компанияны жамауат бла байламлыкъла бёлюмюню башчысы Будайланы Лейла.