Жаш адамланы патриот сезимлерин кючлер акъылда

Къабарты-Малкъар къырал университетде жаш адамланы патриот сезимлерин кючлерча ара ачыллыкъды. Анга КъМР-ны Парламентини депутаты, энчи аскер операцияны ветераны    Герман Шевчук башчылыкъ этерикди. 

 Ол кеси  айтханнга кёре, проектни  къурап кюрешгенли бир жылгъа жууукъ   болады. Араны баш борчу  Ата журтларына  уллу кёллю болмагъан чынтты инсанланы бирикдириргеди.

 Дерследе теориядан тышында, практика жанына да аслам эс буруллукду.  Аны магъанасы жаш адамла ариу къылыкълы, тюз акъыллы, жууаплылыкъ алыргъа къоркъмагъан  эм  керти патриотла болуп ёсерча къошумчулукъ  этергеди.

- Тюбешиуле бла дерслеге   сынамлы специалистле къатышырыкъдыла. Баш тема сёзсюз, энчи операциягъа аталлыкъды.  Жарсыугъа, жаш адамланы  бир къаууму къыралыбызны бусагъатдагъы болумундан уллу ангылаулары жокъду.   Ол себепден бизни борчубуз СВО бла байламлы ётюрюкню бла кертини айыра билирге болушургъады, - деп къошханды   Герман Шевчук.

Жигитибиз билдиргенича, студентле республиканы жигитлери бла тюбеширге,  аланы хапарларына тынгыларгъа, жарсытхан сорууларын  берирге  онглары болургъа керекди. Эм биринчиден а, ала  жерлешлерибиз   башыбызда  мамыр кёк сакъланырча   жанларын-къанларын аямагъанларын сезерге  керекдиле. 

Къонакъла саулукълу  жашауну юсюнден айтырыкъдыла,   аманлыкъладан кери турургъа, терс жолгъа ажашмазларындан  чакъырлыкъдыла.

- Жаш адамланы  аз-аздан юйретирге керекди. Ёсе келген тёлюге сакъ кёзден къараргъа тийишлиди. Аны себепли жамауат  бирикмей ол борчну толтурур амал жокъду. Биз  пенсиягъа кетсек,  бизни орунубузгъа Ата журтланы сюйген, намыслары жюрюрген, тюз ниетли,  патриотла келирге керекдиле, - дейди   ушакъ нёгерибиз.