Жангы мектепле ишленедиле

Республикада он мектепни къурулушу андан ары бардырылады. Саулай алып айтханда уа, алагъа алты мингден аслам сабий сыйынырыкъды.

Башхача айтханда уа, бу школла барысы да ишлеп тебиреселе, окъуучула алагъа бир сменнге – эрттенликде-жюрюрча онг боллукъду. Мектепле жангы мебель бла, оборудование бла да жалчытылынырыкъдыла. Ала уа шёндюгюлю излемлеге, жангы окъуу стандартлагъа тийишлиликде алынырыкъдыла.

Хар школда да инженер-техника системала жангыртылынадыла, жол-транспорт инфраструктура да тапландырылады. Къайсы мектеп да не жаны бла да сабийлени тынгылы окъутхан эмда айнытхан арагъа буруллукъду.

Алай бла, Вольный Аулда онекинчи номерли школну жангы мекямы сегиз жюз адамгъады. Аны уллу стадиону, баскетбол, волейбол ойнарча майданлары, ариу сквери да бардыла. Нальчикде онтёртюнчю лицейге бла жыйырма ючюнчю номерли мектепге уа экинчи бёлюмле къошуллукъдула. Лицейде анга-сегиз жюз, школда уа жети жюз окъуучу сыйынырыкъды.

Нарткъалада уа беш бёлюмлю жангы юч къатлы билим бериу махкемеде  тёрт жюз сабий окъурча боллукъду. Мекямны тийресинде оюнлагъа майданла,  жалгъан  кырдыклы футбол стадион къурар мурат да барды.

Андан тышында да, Чегемни «Южный» микрорайонунда жангы мектеп ишлене турады. Анда уа бир жолгъа 820 адам сыйынырча онг боллукъду.