Ток ызгъа тёрт мингнге жууукъ абонент къошулгъанды

Быйыл жылны аллындан бери «Россети Северный Кавказ» - «Каббалкэнерго» ток бла жалчытырча 3 940 абонент бла келишим этгенди. Аладан 643 организацияладыла, къалгъанлары уа энчи иелиледиле.

- Ток бла жалчытыу келишим биринчи тёлеуден неда энергокюч сетьге къошулгъан кюнден башлап   кюч алады. Организацияланы юсюнден айтханда, ол эки жаны бла да къабыл этилгенден сора закон кючюне киреди. Аны юсюнден толу хапар биригиуню сайтында жазылады, - дегенди «Россети Северный Кавказ» - «Каббалкэнерго» биригиуню таматасыны орунбасары Хасанбий Шериев.
«Россети Северный Кавказ» хайырланылгъан электрокючню багъасын келир айны онунчусуна дери тёлерге кереклисин къайтарып эсгертеди. Анда айтханларыча, эсеплеген приборда шартланы да ай сайын 23-25 кюнледе алагъа сёлешип билдирирге керекди.

Жерине барып тёлерге сюйгенлеге уа хайырланыучуланы жумушларына къарагъан арала ишлейдиле. Ахчаны почтаны бёлюмлеринде кёчюрюрге да жарайды.

Бир тюрлю сылтау бла юйден чыгъалмагъан неда кеси барып, тёлерге онгу болмагъан бу жумушну «Свет онлайн» приложенияда, компанияны сайтында «Энчикабинетде» (www.gp-lc.ru) неда «Сбербанк Онлайн» сервисде тамамларгъа боллукъду.

Токну багъасы заманында тёленмесе, компания аны кесип кетерге эркинди. Борчну уа сюдге жиберип, алай алыргъа боллукъдула.

Ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.