Миллет проектле бла байламлы соруула сюзюлгендиле

«Тёрели «муниципал сагъатны» бардыргъанма, анда сёз район администрацияланы эмда шахар округланы башчылары бла миллет проектлени бла къырал программаланы толтурулууларыны юсюнден баргъанды», - деп жазгъанды КъМР-ни Башчысы Казбек Коков кесини телеграм-каналында.

«Миллет проектлени бёлюмлерине кёре, «Хар сабийни жетишими», «Маданият арала», «Чыгъармачылыкъ иш бла кюрешгенле», «Цифралы культура», «Жаш тёлюню патриот ниетледе ёсдюрюу», «Россейни жаш тёлюсю» деген регион проектлени жашауда бардырабыз. Андан сора да, шахар тийреледе тап болумланы къурау, оюла тургъан юйледен кёчюрюу, регион эм жер-жерли автомобиль жолланы эм турист инфраструктураны айнытыу деген соруула сюзюлгендиле. Орта эсеп бла алып айтханда, ала артха къалмай 70 проценте толтурулгъандыла.

 Дагъыда бюгюнлюкде 26 къырал программаны жашауда бардырабыз, аладан жыйырмасына федерал ахчаланы къошумчулукълары да барды.

 Жылны аллындан бери сагъынылгъан программаланы толтурургъа 41,6 миллиард сом бёлюннгенди, ол белгиленнген ёлчемледен 68,6,процентни тутады. Ахчаланы асламысы саулукъ сакълауда, билим бериуде, спорт, маданият бёлюмледе социал магъаналы ишлени эм башха жумушланы тамамларгъа къоратыладыла.

Жыйылыуда дагъыда хайырланыргъа берилирге керекли 40 жангы эм тынгылы ремонт этиле тургъан социал магъаналы объектлени юсюнден да сёлешиннгенди. Аладан алтысыны къурулушлары бошалгъанды, къалгъанларында ишле тюрлю-тюрлю хазырлыкъдадыла. Ол саннга  мектепле, спорт мекямла, маданият юйле, жолла, жамауат эмда арбазлагъа саналгъан тийреле,  жашау журт-коммунал мюлк инфраструктура киреди», - деп айтылады билдириуде.