Хар проект бла да тынгылы кюрешедиле

Алгъаракълада КъМР-ни Жаш тёлюню ишлери жаны бла министерствосу КъМР-ни Башчысы Казбек Коковну оноуу бла КъМР-ни жаш тёлю политикасыны бардыргъан  муниципал району» деген эришиуню бардыргъандыла. Анда биринчи жерни Черек район алып, 1,5 миллион сом сертификатха тийишли болгъанды. Черек районну администрациясында жаш  тёлю совет да «КъМР-ни эм иги муниципал районларында эм иги жаш тёлю  ара» эришиуде экинчи жерни да алгъандыла.   

Аны себепли Къашхатауда жаш тёлю араны юсюнден энчи айтырчады.  Биттирланы Жамбулатны башчылыгъы бла ала кёп магъаналы эришиуле, мастер-классла, проектле да къуралгъанлай турадыла. Алгъаракълада СКФО-да грант эришиу болгъанды, анда алты ишден ючюсю белгиленнгенди. Экиси уа Черек районну арасында ишлеген Сараккуланы Хасанны «Сохраняя прошлое создаем будущее» бла Бапыналаны Шахризаны «Праздник национального блина» ишлери болгъандыла. Ол а уллу жетишимледен бириди.   

Черек район туризм айный тургъан жер болгъаны себепли, ала анга да уллу эс бурадыла. Юйюрлени бирикдирирге, таулада солургъа баргъан кезиуде абызырамазча от этерге, чатыр салыргъа, аш-суу этерге да юйретгенлей турадыла.

 - Бу эришиу тынч болмагъанды. Анда араны хар атламы, волонтёрла бла ишлеулерине да уллу эс бурулгъанды. Хар не жумушха да энчи кёлюбюзню салабыз, жюрегибиз бла хайыры болсун деп толтурабыз аны. Сабийлени чакъырып, ала да къатышырча, билимлерин ёсдюрюрча амалла излегенлей турабыз. Къышда бардырылгъан «Блокаданы гыржыны» акциябызгъа районда хар элден да абадан классланы окъуучуларын жыйып, Огъары Малкъаргъа таулагъа элтгенбиз, ала барысы иги да ач болгъандан сора уа, отда къара гыржынчыкъланы жылытып ашатхан эдик. Алагъа блокаданы къыйынлыкъларын айтып къоймагъанлай, кеслери аны сынарча этгенибизге, ол къыйынлыкъны ала бютюн терен ангылагъандыла. Адамла къаллай зарауатлыкъдан ётгенлерин, ол халда жангыз бир кюнню угъай, жылла бла жашагъанлары уа кёллерине жетген эди. Быллай жумушларыбыз сабийле бла  керти да ишлеген, аланы тюз сезимлерин айнытхан мадарла боладыла, - дегенди араны СМИ бёлюмюню таматасы Къадырланы Зульфия.  

Бизни миллетде не заманда да къонакъбайлыкъ энчи жерни алып тургъанды. Арада жаш адамла ишлегенликге, ала адетлеге уллу эс бурадыла, ары баргъан хар къонакъгъа аш - суу бла тюбегенлерин, кёллерин жарытханларын а энчи белгилерчады. Ары келген турист, къонакъ да аны ючюн жаш адамлагъа ыспас этедиле. 

Ала тутхан ишлерине кёллерин салып, тири кюрешгенлери ючюн а байрамдан сора Черек районну администрациясыны башчысы Къуллбайаны Алан да келип алгъышлагъанды. Мындан ары да ишлерин тынгылы бардырып, бир болуп, жаш тёлюню айнытып турургъа кереклисин да чертгенди ол тюбешиуде. Ишлерин да белгилеп, «Биринчилени атламлары» битеуроссей   биригиуню район бёлюмюню специалисти Мокъаланы Айзаны жаш тёлю ишлери жаны бла федерал агентство алгъышлагъанын билдиргенди.   Бапыналаны Шахризаны уа жаш тёлюню ишлери жаны бла магъаналы проектлени бардыргъаны ючюн ыразылыкъ къагъыт бла саугъалагъанды.