Полимерден композитле кёп турлю бёлюмде хайырланылырчадыла![]() Къабарты-Малкъар къырал университетни алимлери медицина имплантатлагъа жараулу темирча къаты полимерле жарашдырадыла. Ала титандан эки кереге женгилдиле эм бек иссилеге, сууукълагъа да тёзюмлюдю. - Полимерле радио толкъунланы бла рентген таякъланы чырмаусуз ётдюредиле. Пластик импланты болгъан саусузгъа компьютер эм магнит-резонанс томографияны ётерге да жарайды. Тыш къыраллада быллай материалланы эрттеден бери хайырланадыла. Бизге да тышындан келтиргендиле. Болсада аланы бирин алырча юч медицина страховка керекди. Бюгюнлюкде кесибизде аллай материалланы жарашдырырча сертификацияны ётерге мардала тийишли халда къуралмагъанлары тыйгъыч саладыла,- дейди КъМКъУ-ну илму жаны бла проректору, прогрессив материалла эм аддитив технологияла араны таматасы Светлана Хаширова. Нальчикде бийик технологиялы полимерле чыгъарылгъанларына бир-бирде сейирге къаладыла. Болсада республикада 1960 жылда окъуна профессор Абдуллах Микитаевни башчылыгъы бла полимер школ ишлегенди. Ызы бла 2008 жылда ол университетде бир оюмлу алимлени бирикдирип, араны айнытырча уллу къыйын салгъанды. Бусагъатда арада къыралны эм тюрлю-тюрлю органицияланы заказларын толтурадыла. Саулай алып айтханда, бюгюнлюкде миллиард сом багъасына проект толтурулгъанды. Лабораторияда эки жыйырмадан аслам алим урунады. Аланы кёбюсю 35- жыллыкъ жаш адамладыла эм барысы да КъМКъУ-ну выпускниклеридиле. Мында асламысында полимерден композитле жарашдырыу бла кюрешедиле. Ала медицина, космос, автомобиль производство дегенча бёлюмледе хайырланыргъа жараулудула. Сынауланы кезиуюнде тюрлю-тюрлю борчлагъа кёре аланы къурамларын тюрлендирирча, бирси материалла бла келишдирирча ишле бардырадыла. Аллай амалла уа бу жаны бла чексиздиле. Сёз ючюн, Россейни илму фонду буруннгу жылда окъуна сууну тазалагъан, бактерияланы бла вирусланы, ол санда COVID-19 аурууну, къурутхан полимерни къурарча арагъа грант берген эди.
Поделиться:
Читать также:
08.02.2025 - 11:23 →
«Арада жарашдырылгъан керекле жамауатны айныууна къошумчулукъдула»
02.01.2025 - 12:00 →
Илмугъа салгъан къыйынларына – тийишли багъа
09.12.2024 - 13:20 →
Бирге ишлеуню къыйматлыгъына тюшюнюп
22.11.2024 - 11:32 →
«Сайлауума сокъуранмайма»
11.11.2024 - 11:27 →
«Къадар элтген жолум бла баргъаныма ыразыма»
|