Зорлукъ кюч алмазча

Право низамны сакълаучу органланы аскер борчларын толтура жан берген ишчилерини хурметлерине аталып «Басхан терроргъа къажауду» деген аты бла жаш тёлю форум бардырылгъанды. Ол шахарны Маданият арасында къуралгъанды, майданны ишине къатышыргъа республиканы Министрле кабинетини келечилери да келгендиле.

Жыйылыу кёрмючге къараудан башланнганды. Андан сора уа пленар жыйылыу болгъанды. Анда бу жарсыуну тамырларыны, жамауат жашаугъа мурдорлукъ этген къырал эм конституция болумну юсюнден айтылгъанды, къырал дин бла байламлы ишлеге къатышыргъа боллугъуну бла къаллыгъыны, динни жерини юсюнден соруула да кётюрюлгендиле. Экспертле чертгенлерича, осал ниетлени къуугъанла даулашлы, ишеклик туудургъан кезиуле бла хайырлана, адамланы акъылларын терс жанына бурургъа кюрешедиле. 

 - Эки минг бешинчи жылда жаш адамланы аманлыкъ ишлеге кёллендириу къалай баргъанын, ала къолларына сауут алып нек чыкъгъанларын ахырына дери ангылаялмагъан эдик. Ол халкъла аралы терроризмни хатасы бла болгъаны артда следствие ишлени кезиуюнде ачыкъланнганды», - дегенди Къабарты-Малкъарны Правительствосуну башчысыны орунбасары Залим Кашироков.

Республиканы миллетлени ишлери эмда жамауат проектле жаны бла министрини къуллугъун толтургъан Анзор Курашинов айтханыча, бу форумда ала терроризмни огъурсуз ниети бла къажау кюреш бардырыуну, сабийлени, жамауатны алагъа алданыудан сакълауну амалларын излейдиле. Алай бизден террористле этерге сюйгенле да, бусагъатда бош турмайдыла, деп белгилегенди ол. Жыйылыуда дагъыда кёп сейир оюм айтылгъанды, къыралыбызны тарыхында эм ачыулу, къоркъуулу кезиуле, террористлени къапханларына тюшюп, аманлыкъ ишле этип ёлген неда тюрмелеге олтургъан жаш адамларыбыз эсгерилгендиле.

Пленар жыйылыудан сора уа форумгъа къатышханла, къауумлагъа юлешинип, лекциялагъа тынгылагъандыла, кётюрюлген соруулагъа кёре оюмларын билдиргендиле.