Ажашхан жан

Жашы Тахир бла арасы иги болгъаны себепли, бу жарсыуларын анга билдиреди. Адам улу сёзге ёч болады. Узакъ да бармай, иш ачыкъ болады да, Аминат бу хапарны биледи. Жарлы тиширыуну жюреги ненча кере сынаргъа керекди бу дунияда? Биринчи этген мурдарлыгъын кечип, бир жукъ да болмагъанча, шо бир кере окъуна эрини эсине салып, жюрегин иш къыйнамагъанды. Баям, сюе болур эди сабийлерини атасын, жашауунда нёгерге сайлагъан адамын.

Аминат сёз кётюргенде, Аслан уялмай, ол тиширыу Тахирни адамы болгъанын айтады. Сейирден бла апчыгъандан тили тутулургъа жетген Тахир, боюнуна алады атасыны ётюрюгюн да, гюняхын да. Аминат а харип, узакъ элден келип, общежитде жашагъан Жамиляны, эки аягъын бир уюкъгъа сугъуп, юйюне келтиреди. Не болса да, къарыны бурунуна жете тургъанны сансыз этерге къоймай, Тахирге бек къаты болады. Жамиля къонакъ отоуда жашайды. Къарынындагъы сабий да биягъы жашчыкъ боллукъду. Энди Аслан да,  сюйген тиширыуларыны араларында бир да ышныры бузулмай, ётюрюгюне кеи да ийнаннганча, ырахат жашай береди. Жарлы Тахир а  жалгъан сюймекликден туугъанын кеси да билмейди. Аллай бирге Аминат аны баууруна, ёшюнюне къысхан эди, ана жылыуун да кемсиз берген эди. Бюгюнлюкде бууаз къатынны эшикге атаргъа неда атасын отха сугъаргъа аны кишилиги эркин этмей, тынгылап, не боллугъуна туурадан къарай эди.

Асланны бу ётюрюгюню да юсю ачылады.  Аминат анга этилген артыкълыкъны бла сыйсызлыкъны кётюралмай, юйден кетеди. Энди сабийлери кеслери юйюрлерин къурар жыл санда болгъанлары себепли, алагъа да артыкъ жарсымагъанды. Бет болмаса, терлер заты къалмайды адамны. Аслан,  этгенине сокъуранып, биягъы эки орталыкъда башы хайран болуп айланады. Бир да болмаса, тамбла кеси юйюрлерин къурарыкъ сабийлерине келлик эриши сёзню сагъышын этсе эди уа…

  Аллахны сынамына чыдай, жиляй-жиляй,  Аминат жюрек ауруулу болгъанды. Тынчмыды, аллай бир бетсизге жашауун къоратханын сезген? Насыбын,  солур хауасын, жашау магъанасын а юч сабийинден табады.

Къутулур заманы жетгенде, Жамиляны больницагъа тапдырадыла. Былайда аны юсюнден да бир оюмубузну айта кетейик. Жамиля атадан бла анадан ёксюз къалып,  аны ана къарындашы бла аны юй бийчси ёдюргендиле. Не иги болсала да, ёксюзню жашауу, жюреги да такъырды. Ким биледи, Асланны ариулугъуна, ётюрюк сёзлерине къалай алданды. Ишин этген киши, муратына жетгинчи бар амалларын хайырлана, ёксюз къызны жашауун бузгъанды. Жамиля да бу сюймекликден гитчелигинден излеген, тансыкълагъан ата жылыуунму излей болур эди…Алай, болгъан болду, артха къайтыр жолу жокъду.

Эрттенлиги бир суху эди Жамилягъа. Къарны бура, аркъасы тарта, къутулур кюнюню жетгенин ангыларча. Нек эсе да, бир бек къоркъа эди ол. Больницада тёгерегине чабышхан врачла бир кесек селейтселе да къоркъууун, ичинден бир тынгысызлыкъ жандыра эди кёкюрегин. Жарлы сабий, тиширыугъа сабий табыуу юч ажалдан бириди деучюдюле эрттегилиле, быллай кюнюнде жапсарыр анасы болмаса, неда сабийини атасындан къууаналмаса, несине ышансын?

Жаланда Тахир алып келген эди аны больницагъа да, ол да бетсизлик эталмай, ол гюнахссыз тууарыкъ сабийге жаны ауруп. Ким биледи,  кесини сабийлигими  туудура болур эди аллай сезимлени. Жарсып, сакълайды   къутулгъанларыны, экиси да иги болгъанларыны хапарын.  Сабий дуниягъа келе тургъан кезиуде, баласыны биринчи къычырыгъын эшитгенлей, Жамиляны къан тамыры атылып, сабий тапхан столда жан береди.

Насыпсыз туугъан, насыпсыз жашар да, ёлюмю да насыпсыз болур,  деучюдюле. Жамиляны да ариулугъу, жашлыгъы, насыбы, ышыныуу бла ийнаныуу бир кюнню ичинде юзюлюп, жерге кёмюлдюле. Аны жууукълары энди келип, ёлюгюн элтдиле. Къайда эдиле бюгюннге дери? Тынчлыкъда 9 айны жашамагъан сабий къызны, эгечини аманатын сакълаялмай, къоруулаялмай, энди уа салын да юйюне элтирге, къоншуладан буюгъуп, башха жерде асырагъанды. Не десенг да, Жамиляны ана  къарындашы бир ауур жюкден къутулду.

Болгъан ишледен хапар алгъан Аминат, бек жиляды, жарсыды. Бир кере да ол Жамиляны къаргъамагъан эди, сабийден ауур болгъаны ючюн ичинден кюе эди аны да къадарына.  Алай  энди ортада бир сабий барды,  Тахирча, анасындан айырылгъан. Асланны бети жерге кире, башын кётюралмай айланады. Сора уа не? Энди аны халындан кимге не хайыр? Сабийчик саулукълу, пелиуанчыкъ кибик, 4 килодан артыкъ ауурлугъу бла туугъанды. Энди анга жашау къайсы тюрсюнлерин кёргюзтсюн?!  Анам, деп кимге къысылсын?! Тахирча насыплы болалырмы?!

Дуниягъа бирле жаланда  Аллахны жолунда барыргъа, игиликле этер ючюн келедиле. Бирле уа, ол жолдан кёп кере тая, кеси жангылычларындан юлгю бла дерс алалмаз къадар жарлыдыла. Ана жюреги Аминатны чыдаялмай, юйюне къайтып, ол сабийни больницадан алып, кеси баууруна жангыдан къысды. Аны аналыкъ сезими тюрленмей турады, алай, тиширыу сезими, сынып, муру-чуру болгъанды. Аминат биягъы ачыуун ол жангы балачыкъ бла унута, кюле, къууана жашайды. Аны берген Аллахына кюн сайын ыспас эте, намазын башлагъанды. Асланны уа жюрегинде къаллай сезимле къайнай болурла? Саудан ёлю кибик болгъанды. Алай, омакъ да кийинип, сау кюнлени орамда машинасы бла жортууун а бир да къоймагъанды. Акъыл, ол хар кимге да берилген саугъа болмаз, берилсе да, аны бла кёпле кереклисича хайырлана билмеген сунама…

Баргъаны. Аллы 22 октябрьде басмаланнганды.