Ажашхан жан

Керти хапар

Адамланы кёбюсю жашауларында не къадар абынсала да, андан дерс алалмайдыла. Дагъыда тёгерегиндегилени терслерге кюрешедиле. Мен сизге керти да жашауда болгъан бир ишни, юйюрню юсюнден хапарларгъа сюеме.

Махмут бла Аслан сабийликден да татлы шуёхла болуп жашай келгендиле. Бири къыйын болумгъа тюшсе,  экинчиси анга  болуша. Туураларындан къарагъанла алагъа бек сукълана эдиле  къарындашлыкъ эте билгенлери ючюн бири бирине. Юйюрлери да артыкъ къолайлыла болмагъандыла, жаланда ёз къыйынлары бла кечине келгенле.

Бир жыл  шуёхла,  бир ётюрюкню хайырлана, уллу ахча тюшюредиле да, аны бла энчи иш къурайдыла кеслерине. Бир-бирге бара, келе Асланны бла Махмутну эгечи Патийни араларында сюймеклик жаратылады. Асланны ол кезиуде юйдегиси бар эди.

Махмут бла биягъы  была бир харам ишге сугъулгъанларында, быланы ызларындан милиция болады да, Аслан къачып къутулады, Махмутну уа тутуп, 9 жылгъа тюрмеге олтуртадыла. Не десек да, аны кишилик шарты кёбюрек болур эди, нёгерин сатмай, бар терсликни боюнуна алады. Аслан да бир да тохтамай анга тюрмеге керекли затланы жиберип турургъа, Махмутну юйюрюне бла гитче сабийлерине кёз-къулакъ болургъа сёз береди.

Аууз айтханча уа  бир зат да болмайды. Кюнлени биринде Патийни сабийи боллугъун ангылап, Аслан къоркъады, ол кюннге дери Махмутха берген сёзлеринден да артха турады. Патий а  биринчи сабийин кетертсе, андан сора ана болалмазлыгъындан къоркъуп, табаргъа таукелленеди. Тюрмеде тургъан Махмут болумдан хапар алгъанында, ачыуундан жан жанын ашай, тенгин харам этеди. Андан сора да,  Аслан   берген сёзлерини бирине да ие болалмагъаны ючюн,  андан сау чыкъса дертин жетдирирге сёз береди. Жамауатдан, бедишликден да бугъа, Патий сабийни табып, келтирип Асланнга береди. Юйюрюндегилеге уа, сабий  ёлгенди  деп къояды.

Этер амал жокъ эди, Аслан,  къагъанакъны  келтирип  жаш юй бийчесини къолуна береди. Ол а эрин асыры сюйгенден, Аллахны бир сынамынача, саугъасынача къарайды. Артдан - артха Аминат, Асланны юй бийчеси, кеси сабийлери болгъандан сора да, ол жашчыкъгъа, Тахирге, бютюн бек юйренеди. Тапхан  башха къатын этгенликге, аны биринчи ыйыгъындан анга аналыкъны ол этгенди.

Жылла оза барадыла. Асланны да ишлери тюзелип, мюлкю да кёбейеди, хар кюню да къууанч бла ётеди. Махмутдан кёп  замандан бери хапар болмагъаны себепли, къутулдум деп,  аны да унутады. Аны къыйынын да ашагъанын, эгечини жашауун бузгъанын да эсине бир да келтирмейди. Аминат бла бирге юйюрлеринде дагъыда  къыз бла   жаш да тууадыла. Махмут а,  тюрмеден чыгъып, юйюрюн да алып, тыш къыралгъа кёчюп кетгенди. Аллахха табынып башлагъаны, намаз этип, тюз жолгъа тургъаны себепли, дертинден артха тура, Аллахха бергенди тюзлюкню айырыуун.

Акъыл, ол хар кимге да берилген саугъа болмаз. Берилсе да,  аны бла кёпле кереклисича хайырлана билмеген сунама. Отузжыллыкъ сабийлери болгъан Аслан, тыйылмайды. Биягъы ташада бир сюймекликге булгъанады. Къызы бла тенг болур эди, бу жолгъу сюйгени. Ишчиси бла бирге аллай жашырын сезимледе  жашагъан Аслан  кюнлени биринде хар жашырын   туура боллугъун билмей кёре эдим. Биягъы къыз мындан сабийге ауур болады. Кертисин айтханда,  Асланны энди аппа болур заманы эди, алай ол ата боллугъуна артыкъ къууанмай, сабийни кетертирин излейди. Жамиля, алай эди жангы сюйгенини аты, арталлыда къатына къоймай, дуния тюбю башына бурулса да, ол сабийни табарыгъын айтады. Алай бош къыз болмагъанды Жамиля да. Хар кюнден кёпден-кёп излей, ахырында Аслан юйюрюнден айырылып, аны бла  бирге болурун тилегенди. Киши сёзюн ангылаталмагъан, киши къылыгъы болмагъан Аслан а эки орталыкъда сюрюне айланады.

Аллы. Баргъаны 24 октябрьде басмаланырыкъды.