Къуру дарманла ичип турмай

 Бусагъатда адамла кёп заманларын социал  сетьледе оздурадыла, бир затлары ауруса, бир бирлеринден халкъ рецептле сурайдыла. Биз аланы бир къауумун бирге жыйышдыргъанбыз.

Хайырлы балхам

Иммунитетигиз къарыусуз болгъан эсе, чархыгъызны тюрлю-тюрлю жерлеринде чачырауукъла чыгъарыкъдыла, ирин этген кезиуле да боллукъдула. Аллай заманлада быллай балхамны жарашдырыгъыз: бирер къашыкъ унну, бал тузну (балны), хант тузну, спиртни (аракъыны) эм бир соханны, духовкада биширип, къабукъларындан тазалап, эзип, аланы барысын да бирге къошуп, иги къатышдырыгъыз да, ауругъан жерлеригизге салыгъыз.

Тёреде болуучусуча, бир суткадан сора ирин, кёпчюу да кетерикдиле, дагъыда бир кюн озгъандан сора уа, жарала иги боллукъдула. Бек иги жарагъан дарманды.                                                                                               

Сарымсах тютюнню ичигиз

Башыгъызны жалкъытхан жётел ичигизни тышына чыгъаргъанча къыйнай эсе, сарымсахны къургъакъсыгъан башындан этилген сигаретни, тютюннюча, ичигиз. Бу битимни баш ёзегинден бир кесегин кесип алыгъыз, узун ийнени аны ортасы бла ётдюрюп, ичинде тешик этигиз, алай бла,  жарашдырылгъан быргъыны бир жанын къабындырыгъыз да, бирси жанын а, эринлеригиз бла тутуп, сигаретнича, тартыгъыз.  Сарымсах сигаретаны  ингирден-ингирге тартып туругъуз, 3 кюн озгъандан сора уа, жётелигиз кетерге керекди.

Жётел кечегиде жукъларгъа къоймай эсе, исси суудан бир стаканнга 3 тамычы йодну къошуп ичсегиз, болушурукъду.                                                                                                       

Бюйрекледе ташланы эритеди

Юч литр  хуппегиге (юйде сыгъылгъан бишлакъдан къалгъан болса игиди) жангы табылгъан 4 жумуртханы (энчи иели мюлкде тутулгъан тауукъла тапханла болсала, бютюнда иги) тышлары бла салыгъыз. Банканы башын марля бла жабыгъыз, юсюн а къара быстыр бла бастырыгъыз да, 10 кюнню шкафны ичинде турургъа къоюгъуз. Андан сора уа банканы башында къуралгъан мугут къабукъну кетеригиз, жумуртхаланы чыгъарып, алада ийне бла тешик этигиз, ичлериндегин табакъчыкъгъа саркъдырыгъыз, жукъа болгъан тышларын  атыгъыз.  Ол табакъгъа 300 грамм балны къошугъуз да, иги къатышдырыгъыз эм банканы ичинде хуппегиге къуюгъуз, аны уа, холодильникге салып, бир сутканы турургъа къоюгъуз. Андан сора уа алай жарашдырылгъан дарманны жарым стаканын эрттенликде бла ингирликде ашарны аллында иче-иче туругъуз. Бир банканы саулай ичип бошагъандан сора, УЗИ-ге барып къаратханын, ташлары  жокъ болгъанын да жазады интернетде бир тиширыу.

Бу жазгъан амалла бла хайырланырны аллында уа врачдан сорургъа унутмагъыз, сора бу халкъ дарманланы къурамларында затлагъа сизни аллергиягъыз болгъанын бла болмгаъанын эсигизде тутугъуз.