Къырал Думагъа айырыулагъа хазырланыу башланнганды

«Единая Россияны» башчысы Дмитрий Медведев регионлада толтуруучу комитетлени таматалары бла тюбешиуде борчла салгъанды.  Сёз 2025 эм 2026 жыллада айырыуланы, партия системаны кючлеуню юслеринден баргъанды.

Кенгешни ача, Дмитрий Медведев партия озгъан айырыу кампанияда аны жанлыланы тизмесин кенгертгенини эмда жамауат Президентге тутхучлукъ этгенин кёргюзтгенин чертгенди.

- Алай бу тарихле бла чекленип къалыргъа жарамайды. 2025 жылда айырыулагъа, бютюнда 2026 жылда, Къырал Думаны депутатларын сайлаугъа хазырланыргъа керекди. Алада да жетишимли боллугъубузгъа ишексизме,-дегенди партияны оноучусу.

Салыннган борчлагъа жетишир ючюн а, айырыучула бла тири ишлерге керекди.  «Къыралны Башчысы салгъан борчланы  бла партияны халкъ программасын толтуруугъа, миллет сейирлерибизни къоруулаугъа баш магъана бериледи»,-дегенди ол.

Аны бла бирге партияны регионлада даражасын ёсдюрюрге кереклисин чертгенди. «Бюджетле къалай къуралгъанларын дайым да тинтиу башчылыкъ этген партияны борчуду. Ол а къыралны жанындан социал гарантияланы федерал, регион эм жер-жерли даражада тамамлаугъа себеплик этерикди»,-деп къошханды. 

Регионлада партияны толтуруучу комитетлерин тири болургъа чакъыргъанды, ол санда энчи аскер операцияны муратларын жашауда бардырыуда. Дмитрий Медведев ала жандауурлукъ жюкню къураугъа эм аны жангы регионлагъа жетдириуге, фронтда аскерчилени кереклерин жалчытыугъа жууаплы болгъанларын белгилегенди. «Бу жумушланы бийик даражада толтургъаныгъыз ючюн ыразылыгъымы билдирирге сюеме. Бу ишни андан ары бардырыргъа керекди»,-деп белгилегенди партияны оноучусу.

Сёз жаш тёлюню, жамауатны партия жашаугъа сингдириуню, аны тизгинлерин жангыртыуну юслеринден да баргъанды. Аны бла бирге партияны биринчи бёлюмлерини ишлерине энчи эс бурургъа чакъыргъанды.

- Биринчи бёлюмлени секретарьлары бла келечилери партия къуллукъда ёсерге онг болгъанын билирге керекдиле. Ол партияны саулай айнытыргъа онг берликди. Биринчи бёлюмле уа магъаналы жумушла толтурадыла, ала адамлагъа жууукъдула, аланы къайгъылары бла жашайдыла,-деп белгилегенди Дмитрий Медведев.

 Ахырында ол 2025 эм 2026 жыллада сайлаулагъа  заман аз къалгъанын эсгертип, айырыучула бла ишлерге кереклисин чертгенди.   «Единая Россия» Къырал Думагъа депутатланы сайлаугъа хазырланып башлагъанды. Партияны съездинде, ол 14 декабрьде бардырыллыгъы белгиленеди, борчларыбызны андан ары сюзерикбиз»,-дегенди.

 Жыйылыугъа партияны генсоветини секретарыны къуллугъун толтургъан   Владимир Якушев да къатышханды. Ол а айырыулада жетишимли болур ючюн, битеу амалланы хайырланыргъа кереклисине эс бургъанды. Ол санда  партия проектлени, «Единая Россия» жанлыланы регионлада советлерин, жаш тёлю гвардиячыланы, жамауат приёмныйлени, депутатланы. «Регионлада бирикген команда къуралыргъа, федерал ара бла байламлыкъда ишлерге керекди»,-дегенди ол.

Партияны КъМР-де регион бёлюмюню толтуруучу комитетини башчысы Дмитрий   Парафилов   KABARDIN-BALKAR.ER.RU сайтны журналистлерине айтханыча, тюбешиу хайырлы болгъанды.

- Келир эки жылда айырыулагъа хазырланыугъа энчи эс бурулгъанды. Жетишимлеге къарамай, мындан ары да жамауат бла байламлыкъда ишлерге кереклиси чертилгенди. Партия  регионладан башламчылыкълагъа не заманда да  энчи эс бургъанды, мындан ары да алай боллукъду. Федерал араны бла регионланы байламлыкъларын кючлеу энтта бир магъаналы борчду,-дегенди  Парафилов.