Жерчиликде уруннганланы ишлери бла шагъырейленнгендиле

Алгъаракълада  Юг Россейни эл мюлк предприятияларыны келечилери къатышып  «PROАгро СКФО 4.0» форум бардырылгъанды. Аны чеклеринде республиканы жетишимли эл мюлклери бла шагъырейленирча    агротур бардырылгъанды. Ол   "Миллет фермер" ассоциацияны   регионда таматасы, агроблогер Мурат Теуновну башчылыгъы бла ётгенди. 

Анга къатышханла  «Юг-Агро» биригиуде болгъандыла, кёкшуу, нартюх, наша,   жууала  ёсдюрген бахчаланы бла теплицаланы да  жокълагъандыла.  

Ызы  «Элпек тирлик» терек бахчалыкъда алма жыйгъан техниканы ишине къарагъандыла.  Аллай амал  адам къолун    тёрт кереге аз хайырланыргъа болушады. Эм магъанасы уа тирликге заран жетдирилмей жыйылгъаныды.  Комбайнны конвейер ызы  жемишлени къаралтмай энчи   контейнерлеге къуяды. Аны ючюн  аланы кёп заманны ичинде сакъларгъа онг  барды. 

 Агротургъа  «ScarabelliGroup» биригиуню экспорт  жаны бла  менеджери Стефана Вертуани да къатышханды. Биригиу къыралда    ландшафт  эм эл  мюлк жерлени сугъарырча обоудование бла жалчытады. Сынам кёргюзтгенича,  сугъарырча мадар этилгени бай эм качестволу  тирлик алыргъа болушады.

 Форум РФ-ни Эл мюлк министерствосуну, Россельхознадзорну бла "Иш кёллю  Россейни" республикада бёлюмлерини, Нальчик шахарны администрациясыны билеклиги бла барады. Аны баш партнёрларындан бири уа   Россельхозбанкны бёлюмюдю.