Производствосун ёсдюрюр муратлыдыла

Прохладный шахарда орналгъан "Кавказкабель" завод производствосун тёрт кереге кёбейтирге таукелди.

Проектге кёре жууукъ заманда предприятие багъыр темир чыбыкъла чыгъарыуну айгъа 200-ден 700-ге жетдирир умутлуду. Аны жашауда бардырырча инвестор жангыдан уллу производство комплекс ишлегенди. Анга кёре беш ыз къураллыкъды. Бюгюнлюкде Къытайдан келтирилген оборудованияны ол къыралдан келген специалистле жарашдырып кюрешедиле.  

- Жангы ызла толу кюч бла ишлеп башласала, производство, кенгертилгенден сора да, 250 адамгъа ишчи жер къураллыкъды. Ызы бла проектни чеклеринде энтта да 50 адам урунурча мадар этилликди. Ол шарт заводну 65-жыллыгъына эм уллу саугъаладан бири боллугъун да энчи чертип айтырчады, - дегенди «Кавказкабель-ТМ» биригиуню тюрлю-тюрлю соруула бла байламлы бёлюмню таматасы Игорь Кузнецов.

- Бусагъатда бизни продукциягъа уллу сурам барды. Бютюнда санкцияланы кезиуюнде алыучуланы санына къошулгъанды. Ол шарт бизни бютюн иги ишлерге кёллендиреди. Хазыр продукциябызны кёбюсюнде къыралны регионларына бла Белоруссиягъа ашырабыз. Уллу партнёрларыбыздан бирлери нефть, газ чыгъаргъан биригиуле бла Москваны метрополитенидиле. Ала качествогъа аслам эс бургъан уллу эм даражалы предприятияладыла. Продукциябыз толусунлай ГОСТ-ха келишгени себепли, бизни бла ишлерге сюедиле, - деп къошханды Игорь Кузнецов.

Бюгюнлюкде «Кавказкабель-ТМ» Къабарты-Малкъарны жетишимли ишлеген промышленный предприятияларындан бириди. Ол 15 мингден артыкъ тюрлю-тюрлю кабель чыгъарады. Анга нефть, газ, темир жарашдырыу промышленностьлада, транспорт инфраструктурада, энергетикада эм къурулуш бёлюмде да сурам уллуду.   
Завод жангыртылгъандан сора быйыл ноябрьде ишлеп башларыкъды.