Заманында тёлегенлени санына къошулады

 «Россети Северный Кавказ» - «Каббалкэнерго» биригиу быйыл сегиз айгъа нальчикчилени ток бла 98,5 процентге жалчытханды. Сагъынылгъан кезиуде шахарда жашагъан абонентле 441,5 миллион сом тёлегендиле. Былтыр бу заман бла тенглешдиргенде, ол 29,1 миллион сомгъа неда 7 процентге кёпдю.

Заманында тёлегенлени санына къошула баргъаныны баш сылтауларындан бирлерине – жамауат бла тири билдириу, ангылатыу иш бардырылгъанын, арт заманда абонентле электрон амалны   да тири хайырланнганларын санарчады.
Бюгюнлюкде биригиуню Нальчикде бёлюмю ток бла 95,4 минг абонентни жалчытады. Аланы асламысы, болжалдан кеч къалмай, тёлерге ашыгъадыла. Анета Шхагапсоева да аладан бириди.

- Мен телефонумда «Свет Онлайн» приложения бла айны онунчусуна дери хайырланнган ток ючюн тёлейме. Ол кимге да тап болурча амалды. Аны себеплиги бла комиссиясыз тёлерге, эсеплеген приборда ненча санагъанын жиберирге, къайсы айда къаллай бир берилгенине квитанция бла шагъырейленирге болады. Быллай амал энергокюч компания бла абонентни арасында байламлыкъны бютюн бек кючлегенин да белгилерчады, - дейди тиширыу.

Сервисни  GooglePlay - https://play.google.com/ эм AppStore - https://apps.apple.com/ сайтладан алып этерге онг барды. Токну багъасын компанияны https://gp-lc.rossetisk.ru/ сайтында «Энчи кабинетде», «Свет онлайн» приложенияда, адамланы жумушларына къарагъан аралада тёлерге жарайды.

 «Россети Северный Кавказ»-«Каббалкэнерго» биригиуню келечилери токну къаллай бир саналгъанын айны 23-26 кюнлеринден кеч къалмай жиберирге эм тёлеулени уа айны онусуна дери этерге кереклерин эсге саладыла.

Эсге сала айтсакъ, эки ай чакълы тёлемеген инсанны биригиу ток ыздан кесерча эркинлик бериледи. Андан сора да, кёп заманны тёлемей, борч этип тургъанла игилик бла ангыламасала, аланы закон бла жууапха тартырча онг барды. Аллай амаллагъа: ишлерин сюдге бериу, токну хайырланалмазча чек салыу киреди. Уллу кёллюлюк этгеннге борчундан тышында, тазир тёлерге да тюшерикди.