Гитче эмда орта предприятиялагъа – аз ёлчемли кредитле

Россейде гитче эмда орта предприятияла МСП.РФ къырал цифралы платформада «Подбор и получение микрофинансирования» сервис бла тёрт мингден артыкъ микрозайм алгъандыла. Ол а битеу да он миллиарддан аслам сом болады. Кеси да битеу къырал эмда муниципал организацияла быйыл ал тогъуз айны ичинде берген займланы 27 процентин тутады, деп билдиргендиле Къабарты-Малкъарны «Мени бизнесим» арасындан.

«Гитче эмда орта бизнес бла кюрешгенле былтыр кюзден башлап быллай аз ёлчемли займлагъа заявканы сагъынылгъан платформагъа кирип берирге боллукъдула. Аны хайырындан быйыл тогъуз айны ичинде он миллиарддан аслам сом багъасына кредитле берилгендиле. Займланы орта кёрюмдюлери быллайдыла: ёлчеми - 2,4 миллион сом, ставкасы – 7,3 процент, болжалы - 2,5 жыл. Сёз ючюн, ставкасы, банк кредитле бла тенглешдиргенде, 2-3 процентге азыракъды. Заявка келген кюнден башлап ахча берилген кюннге дери эки ыйыкъдан кёп озмайды», - дегенди МСП Корпорацияны башчысы Александр Исаевич.

Сагъынылгъан сервис бла ахча алгъан регионланы санында баш жерни Иркутск область алады, анда 647,2 миллион сом багъасына 218 кредит берилгенди. Экинчи жерде Удмурт Республикады (541,9 миллион сом), ючюнчюде уа Чуваш Республика (504,3 миллион сом). Ызы бла Краснодар край (479,2) эмда Татарстан (477,2) барадыла.

Александр Исаевич айтханнга кёре, ахчаны ючден бири инвестициялы жумушлагъа жиберилгенди, къалгъаны уа предприятияланы онгларын кючлендирирге къоратылгъанды. Бёлюмлени юсюнден айтханда, башхаланы арасында быллай кредитлени асламысында сатыу-алыу бла кюрешген организацияла эмда абериле чыгъарыучу предприятияла алгъандыла.

Къабарты-Малкъарда уа Гитче эмда орта предпринимательство субъектлени микрокредитле бла жалчытхан фонд 21 микрозайм бергенди. Ол бары да жети миллион сомду.