Республикагъа алтын майдал келтиргенди

Озгъан солуу кюн «Гладиатор» спорт арада ММА-дан къатыш единоборстволадан КъМР-ни биринчи Президенти Валерий Коковну хурметине жораланнган турнир бардырылгъанды.

Он ауурлукъ категориялада ётген эришиуде 11 региондан келген 90-дан артыкъ спортчу кеслерини къарыуларын кёргюзтгендиле. Ала Москвадан, Къабарты-Малкъардан, Чеченден, Ингушетиядан, РСО-Аланиядан, Дагъыстандан, Волгоград, Саратов эм Ульяновск областьладан, Краснодар эм Ставрополь крайладан келген эдиле.

Бизни республиканы келечилерини юслеринден айтханда, ала жетишимли болуп, тюрлю-тюрлю даражалы 7 майдал алып, битеу команда зачётда 2-чи жерде орналгъандыла.

Финалгъа чыгъып, анда да тийишли кёрюмдю болдуруп, «алтынны» 57 килограмм ауурлукъда Сумайланы Ислам алгъанды. «Кюмюшле» къоллу Мырзаланы Арсен (61кг), Алийланы Адам (66кг) эм Халилланы Алан (70кг) болгъандыла. «Доммакъланы» уа Аскер Бирсов (52кг), Зураб Машуков (84кг) эм Мурат Шогемов (93кг) къытхандыла. 

Команда жетишимликни юсюнден айтханда уа, биринчиле Чеченни келечилери болгъандыла. Экинчиле бизникиле. Ючюнчю жерге уа Дагъыстанны келечилери чыкъгъандыла.