Магъаналы башламчылыкъла

«Кёп функциялы жаш тёлю араны» информация бла медиапроектле эм муниципал къуралыулада жаш тёлю бла ишни къурау жаны бла бёлюмюню баш специалисти Атмырзаланы Амина билдиргеннге кёре, ала бу айда бир ненча проектни жашауда бардырыр муратлыдыла.

Биринчиси – «Тёлюлени араларында байламлыкъла». Аны чеклеринде ала Нальчикде Къартла бла сакъатлыкълары болгъанла тургъан интернатха барыр муратлыдыла. Ол акцияны ала 18 октябрьде ётдюрюрге дейдиле.

- Бу ишни къурауну баш мураты – адамла бизни бла бирге алагъа къонакъгъа барып, биргелерине олтуруп, аланы жашауларыны юслеринден хапарларына тынгыларларын сюебиз. Барыбыз да билебиз, хар кимге да анга энчи эс бёлселе нечик хычыуун тийгенин. Аны себепли биригип, алагъа аллай байрам кюн къураргъа сюебиз, - деп билдиргенди ол.

   Алайды да, «Кёп функциялы жаш тёлю араны» специалистлери бла бирге бу жандауурлукъ акциягъа къатышыргъа сюйгенле интернатха ол кюн 11 сагъатда келирге боллукъдула.

  Аланы экинчи проектлери уа «Патриот-кино!» деген ат бла киноклубну ачылыууду. Ол а 25 октябрьде боллукъду. Атмырзаланы Амина чертгеннге кёре, анда патриот сезимни туудургъан, игиликге итиндирген фильмлени кёргюзтюрюкдюле. Кино бошалгъандан сора уа, чачылып кетмей, аланы сюзюуге энчи магъана бёлюнюрюкдю.

- Алай бла биз ёсюп келген тёлюбюзню игини бла аманны айыра билирге юйретирге дейбиз, аланы юслеринден кеслерини оюмларын ачыкъларгъа чакъырлыкъбыз, - дейди ол.

 Андан тышында, киноклубда белгили режиссёрла, актёрла эм тарыхчыла бла да тюбешиуле да къурарыкъдыла.