Жолланы мардалагъа келиширча этедиле

Къабарты-Малкъарда "Къоркъуусуз эм тынгылы автомобиль жолла" миллет проектни чеклеринде туризм объектлеге баргъан жолла тап эм къоркъуусуз болурча аслам иш этиледи.

РФ-ни Правительствосуну Председателини орунбасары Марат Хуснуллин айтханнга кёре, быйыл сагъынылгъан проекни чеклеринде туризм объектлеге – сейир табийгъат комплекслеге, архитектура эсгертмелеге эм башха жерлеге баргъан регионал эм жер-жерли магъаналы 440 километр чакълы жолла мардалагъа келиширча болгъандыла. 

- Арт кезиуде къыралда ич туризм къыстау айный барады. Россейлиледен тышында, тыш къыраллы къонакъла да кёбюсюнде кеси машиналары бла жолоучулукъну сайлайдыла. Аны себепли бизни борчубуз тийишли инфраструктура къоркъуусузлукъ жаны бла излемлеге толусунлай келиширча этергеди, - дегенди Марат Хуснуллин.

Ол билдиргенича, жылны башындан бери тийишли ишле 130 объектде тамамланнгандыла.  Бу жаны бла Къабарты-Малкъарда магъаналы эм уллу объектледен бирине Экинчи Чегем-Булунгу жолну санаргъа боллукъду. Аны 27 километр кесегинде тынгылы ремонт ишле бардырылгъанлы иги кесек заман болады. Тау жерледе, къыйын табийгъат болумну да алсакъ, борчларын толтурурча подряд организацияны келечилерине иги да къыйналыргъа тюшеди. 

Проектге кёре эки машина бир жолгъа ёталмагъан жерледе жол жети метрге кенгертилгенди. Кече жарытырча чыракъла тартылгъандыла эм жаяу жюрюгенлеге тротуарла, машинала сюелирча, къараучу жерле да жарашдырылгъандыла. Къоркъуусузлукъ жалчытылынырча да бир къауум жумуш тамамланнганды. 

Бюгюнлюкде специалистле Чегем чучхурланы бла Булунгуну эм Эл-Тюбюню арасында жолну 25 километр кесегин игилендирип кюрешедиле. Аны бла бирге, Чегем бла Башил турбазалагъа баргъан жолла да мардагъа келиширча боллукъдула.
Быйыл Элбрус районда да миллет проектге кёре, А-158 трассадан Нарзанла талагъа баргъан жолну 300 метрине къаралгъанды.
 

Арт жыллада жолланы игилендирилгенлерини хайырындан туристлени санына да танг къошула барады. Ол шарт республиканы экономикасын айнытыуда уллу къошумчулукъ этгенин, тау элледе жашагъан жерлешлерибизни эм къонакъланы да болумларын игилендиргенин да энчи белгирчады. 

Планнга кёре Чегем ауузунда жолну толусунлай 2026 жылда бошаргъа керекдиле.