Тыш къыралланы бир къауумуна белги жиберилгенди

Кёп болмай Россейни Президенти Владимир Путин атом сауут бла байламлы соруулагъа къарагъан Къоркъуусузлукъ советни жыйылыуун бардыргъанды. Анда шёндю дунияда бола тургъан болум бла Россейге неда Белоруссиягъа чабыууллукъ этилсе, Москва атом сауутну хайырланыргъа право жаны бла эркинлиги боллугъуну юсюнден ачыкъ айтылгъанды.  Аны юсюнден билдириу РФ-ни Президентини сайтында басмаланады.

 «Белоруссияны президенти бла битеу сорууланы сюзгенбиз эм бир оюмгъа келгенбиз. Атом болмагъанлай башха сауутла бла окъуна бизге чабыууллукъ этип, эки къыралны да жалынчакъсызлыгъына тыш къыралла къоркъуу кийире башлагъанларын ангыласакъ, ма ол заманда хайырланырыкъды атом сауут», -дегенди Владимир Путин.

Жыйылыуда къырал башчыбыз атом сауут бла байламлы доктринагъа атом сауутну не заманда хайырланыргъа кереклисини юсюнден тюрлениуле кийирирге кереклисин айтханды. Анда кёргюзтюлгенине кёре, атом сауут хайырланыргъа боллукъ къыралланы эм аскер союзланы  тизмелери кенгертилинедиле, дагъыда аскер къоркъуулукъ къайдан чыгъаргъа боллугъуна жангыдан къараллыкъды. Битеу тюрлениуле къыралны къоркъуусузлугъун жалчытыу бла байламлы этиледиле.

Андан сора да Президентибиз Россейге атом саууту болмагъан къырал чабыууллукъну атом саууту болгъан бир башха къыралны болушлугъу бла этсе, аланы ол ишлерин бизни къыралыбызгъа биригип чапханларыча алай къараллыкъды, деп белгилегенди. Мен оюм этгеннге кёре, бу тюрлениу бек магъаналыды, нек дегенде, бардырыла тургъан энчи аскер операцияны кезиуюнде Украинагъа болушлукъ этмеген НАТО-ну къауумуна кирген къыралладан сора да иги кесекни санаргъа боллукъду. Энди аланы оноучуларына сагъыш этерге заман берилгенди, Россейге къажау сюелиуню ахыры не бла бошаллыгъын ангыларгъа керекдиле.

Жыйылыуда айтылгъаннга кёре, атом сауут жаланда   аслам халда хауа эм космос амалланы да хайырланып, ракетала къырал чекге жууукълашып неда ётюп келгенлерин белгили болгъанлай, ол заманда хайырланыргъа боллукъду. Сёз самолётланы, узакъгъа учхан ракеталаны эм пилоту болмагъанлай кёкде кеслери алларына учхан башха аппаратланы юсюнден барады.

Эсигизге салайыкъ,   2023 жылда март айда Владимир Путин Белоруссияда тактикалы атом сауутну орнатыргъа кереклисини юсюнден айтхан эди. Ол жыл окъуна июнь айны ортасында атом ракетала къоншу республикада орнатылгъандыла. Белоруссиягъа атом ракетала Великобритания Украинагъа   ураны аз болгъан бомбаланы берип башлагъаны бла байламлы кийирилгендиле.  Ол заманда окъуна къырал башчыбыз Москва Белоруссияда атом сауутланы сакъларгъа энчи жерле ишлеригин билдирип эм белоруслу специалистлени хазырлап башлагъан эди. 2024 жылны жай айларыны ахырына белоруслу аскерчиле толусунлай стратегиялы атом сауутха саналмагъан затланы тийишлисича хайырланыргъа окъууну ётюп бошагъандыла.

«Битеу тюрлениуле иги терен тинтилип этилгендиле эм къыралны аллында тургъан шёндюгю къоркъуулагъа къажау сюелиуню къыйматлы амалларыдыла»,- деп чертгенди  Владимир Путин башда сагъынылгъан жыйылыуда.

«Бу жыйылыу Россиягъа атом сауут бла неда башха сауут бла чабыууллукъ этилсе, биз аллай кезиуге хазыр болгъаныбызны шарт белгисиди. НАТО бизни чеклерибизни тёгерегинде, тохтамагъанлай, къаугъаланы къозгъагъанлай турады. Бизге къажау сюелгенлеге неда  чабыууллукъ этерге умут этгенлеге бир амал  бермезге керекбиз, ала, мычымай, тийишли жууап аллыкъларын билирге керекдиле. Биз кесибизни болгъан кючюбюзню кёргюзтюрге керекбиз эмда бирси континентде жашагъан политиклени къызгъан башларын сууутургъа керекбиз. НАТО бизге чабыууллукъ этерге хазыр болуп тургъан биригиуге саналады, ол аны букъдургъан да этмейди. Заполярьеде жерибизге ие болургъа сюеди, аскер базаланы алгъын бизге мамыр болуп тургъан Финляндия да орнатып башлагъанды. Ала бизни не да этип сынаргъа кюрешедиле»,- дегенди къырал башчыбыз.

  Белгилисича, атом доктринаны жангыртыу быйыл Россей жай айлада атом сауутну эм кючлюсюне саналмагъанын хайырланыу бла бардыргъан юйрениуледен сора бардырылады. Запад къыралла ол юйрениулеге артыкъ уллу эс бурмай къойгъан эди, сансыз кибик этип. Ол кезиуде Россияны Сауутланнган кючлери юйрениулени Къыбыла, Ара эм  Ленинград аскер округлада, хауа-космос кючлеринде,  тенгиз аскер флотда  бардыргъанды. Ол кезиуледе тактикалы атом сауутну аскер бёлюмледе хайырланыр амалларын кёргюзтгендиле.

 «Биз кёребиз, запад политикле бир «къызыл ызлагъа» да къарамайдыла, Украинагъа сауутланы сюйгенлерича бир бередиле, Россейни ичине атарагъа жарарыкъ ракеталаны да кийиргендиле ары. Ала энди алай сунадыла, не этселе да, алагъа аны ючюн зат боллукъ тюйюлдю деп», - бек жангыладыла, дегенди «Национальная оборона» журналны баш редактору Игорь Коротченко.