Фатарны аманлыкъчыладан алып алданнганлагъа-болушлукъ

Жарсыугъа, фатарны неда юйню хыйлачыладан алып, адамла жашар жерсиз, ахчасыз да къалгъан кезиуле чыгъадыла. Быллай ачыулу болумгъа тюшгенлеге болушлукъ этер мурат бла къырал казнадан компенсация берилирча буйрукъ къабыл кёрюлгенди. Алай аны бла,  сюдню оноууна кёре, законну аллында хыйлалыкъ этмеген алыучула хайырланаллыкъдыла. Аллай алыучулагъа кимле саналгъанларыны, алагъа къаллай компенсация бериллигини эм Кадастр палатада аманлыкъчылагъа алданмазча къалай болушаллыкъларыны юсюнден республиканы Жамауат палатасыны официал сайтында билдириледи.

Граждан кодексге тийишлиликде, терслиги болмагъан алыучугъа аманлыкъчыдан фатарны неда юйню сатып алгъанда, къырал реестрде данныйлеге таянып, алай журтну аны сатаргъа эркинлиги болмагъан инсандан алгъанын билмеген адам саналады, деп ангылатады Къабарты-Малкъарда Кадастр палатаны юрисконсультанты Ирина Карданова. Быллай болумла фатарны доверенность бла сатханда, сора аны иесини эркинликлери залог бла неда сюдню оноуу бла чекленнген (бусагъатда сюдде даулашла бара тура эселе да) эселе чыгъадыла. Аманлыкъчыланы юслеринден да унутмазгъа керекди. Ала жалгъан документлени кёргюзтюрге боллукъдула: аманлыкъчыла юйню сатаргъа алгъадан да кюрешип, алай законнга бузукълукъ этилип, келишимлери кертиге саналмай къалып, фатарны законлу иеси чыкъгъан кезиуле да тюбейдиле. Приватизацияны толтургъанда,  жалгъан документлени кёргюзтюу неда халатла жибериу да палахха къалдырлыкъдыла, алай быллай кезиуледе журтну иесине къырал саналады.

Сюдде сатыучу хыйлалыкъ этилгенини юсюнден билмегени женгдирилсе, аны юсюнден тийишли оноу чыгъарылгъандан сора анга къырал казнадан компенсация этилликди, бу ахча бир кереге тёленирикди. Аны ёлчеми фатарны кадастр багъасына, этилген къоранчлагъа кёре тергеледи. Алай сюдде ол къоранчланы кесеги тёленнгени тохташдырылгъан эсе, компенсация азайтылыргъа боллукъду.

Ирина Карданова  айтханыча, быллай болумлагъа асламысында фатарны сатыу-алыу бла байламлы келишимлени кеслери алларына толтургъан неда бу жумушда артыкъ жууаплылыкъ сезмеген, гражданланы сейирлери ючюн угъай, кеслерини файдаларына къайгъыргъан «специалистлени» болушлукъларын излеген алыучула тюшедиле. Аны ючюн толтургъан ишлерине жууаплы кёзден къарагъан, бу ишде бир тюрлю файда тюшюрюрге онглары болмагъан специалистле бла ишлегиз, сёз ючюн, нотариусла бла. Ала битеу келген документлени тинтирге борчлудула, тауусулгъан келишимле ючюн артда аладан соруллукъду, дейди ол.

Адам келишимни кеси толтурургъа таукел эсе, фатарны эм анга кимлени эркинликлери болгъаныны юсюнден Бир къырал реестрден выписканы алыргъа керекди. Ол документ сатыу-алыу келишим тауусуллукъ кюннге жууугъуракъ кезиуде берилсе, бютюн игиди. Бу жумушда Росреестрни, Кадастр палатаны эм къырал жумушланы порталында электрон сервисле да болушурукъдула. Палатаны данныйлени хазырлау бёлюмюню башчысы Созайланы Сабина билдиргеннге кёре, Кадастр палатадан излеген информацияны адам къырал пошлинаны тёлегенлей,  талай минутну ичинде алаллыкъды. Гражданлагъа таплыкъгъа электрон сервисле бла хайырланнганда «исси телефон» да ишлейди, палатаны экспертлери уа келишимни тауусурча проектни толтурургъа, керекли документлени  жарашдырыргъа болушургъа хазырдыла.