Оюлур чекге жетген мекямла бла байламлы сорууну тамамлаугъа бурулупду

Регионлагъа оюлур халгъа жетген кёп къатлы юйле бла байламлы сорууланы тамамларгъа онгла къураладыла. Бу кюнледе Къырал Думаны депутатлары анга аталгъан законопроектни биринчи окъулууда къабыл кёргендиле. Документде белгиленнгенича, регионлагъа оюлур халгъа жетген юйде жашагъанланы кёчюргюнчю мекямгъа башчылыкъ этген компанияны салыуну женгилетилген жорукълары кийириледиле. Неда юйде жашагъанла аны кеслери сайларгъа боллукъдула.

Законопроект биринчи окъулууда къабыл этилгенди. Документде белгиленнгенича, оюлургъа къоркъуулу юйледе жашагъанланы кёчюрюу эмда кёп къатлы юйлени тынгылы жангыртыу программала, инвестиция проектле жашауда бардырылгъанлыкъгъа, осал жашау журтланы саны азаймайды. Мекям оюлургъа къоркъуулу болгъаны тохташдырылса уа, анда жашагъанла кёчюрюлгюнчю мекямны болумун тинтгенлей, къарагъанлай турургъа керекди.

Алай бизнесге аллай юйлени кереклерин жалчытыу къоранчлыды, ол себепден алагъа башчылыкъ этерге сюйген компанияла жокъну орунундадыла. Регионну власть органларыны уа бу болумну тюрлендирирге законлу амаллары болмагъанын белгилейдиле документни авторлары.

- Биз регионну власть органларына оюлургъа къоркъуулу болгъаны тохташдырылгъан мекямгъа башчылыкъ этген компанияны сайларгъа эркинлик берирге кереклисин айтабыз. Жаланда анда жашагъанла кеслери сайламагъан эселе аны,-дейди къурулуш эм ЖКХ жаны бла комитетни башчысы – документни авторларындан бири   Сергей Пахомов. 

Депутатла регионну власть органларына журтдан адамла кёчюрюлгюнчю кезиуге дери мекямгъа башчылыкъ этген компанияны сайлау жаны бла женгиллетилген жорукъла хазырлагъандыла. Аны бла бирге аллай компанияланы тизмесин къураргъа эркинлик да бериледи. Мекямны къоркъуусуз халда сакълар ючюн а бюджетден субсидияла бёлюнюрюкдюле (анга ахча салыннган эсе).

Бу мадарла хар осал мекямны болуму бла байламлы оноула чыгъарыргъа себеплик этерикдиле. Алай бла уа оюлур чекге жетген юйледе жашагъанланы къоркъуусузлукъларын жалчытыргъа онг боллукъду.

Россейни Правительствосу бу башламчылыкъны къабыл кёргенин айтырчады.