Жаш тёлю биригирча – жангы ара

Къабарты-Малкъарда жаш тёлюню халкъла аралы биригиую ачылгъанды. Аны мураты жаш тёлю политика жаны бла башламчылыкъланы жашауда толтурууду эм ушакъла бардырырча майдан къурауду.

Шуёхлукъну халкъла аралы биригиуюн къурауну юсюнден оноуну къыралны президенти Владимир Путин Сочиде жаш тёлюню битеудуния фестивалындан сора этгенди. Бюгюнлюкде аны бёлюмлери битеу регионлада ачыла турадыла. Аланы себепликлери бла жаш адамлагъа башламчылыкъларын толтурургъа болушлукъ этилликди, ала бир бирлери бла танышаллыкъдыла, шуёхлукъ жюрюталлыкъдыла, биригирикдиле.

Республиканы Жаш тёлюню ишлери жаны бла министерствосунда уа биз кёп сейир зат кёргюзталлыкъбыз, ол санда туризм, маданият жаны бла да,  дегендиле. Ведомствону бёлюмюню башчысы Лина Мафедз билдиргенича, байламлыкъла асламысында маданият, адет-тёре, спорт, чыгъармачылыкъ, билим жаны бла жюрютюллюкдюле. Ол а, кертиси бла да, сейирди, нек дегенде алай бла дунияны башха-башха жерлеринден жаш адамланы бир затха кёз къарамларын ангыларгъа онг чыгъарыкъды. 

  Вице-премьер Залим Кашироков белгилегенича, проектле офиси бла халкъла аралы жаш тёлю биригиу Россейни бла Къабарты-Малкъарны сейирлерин ачыкълауда эм айнытыуда хайырлы боллукъдула. Ол айтханыча, бизни барыбызны да муратыбыз бирди – мамырлыкъда бла келишиулюкде жашау. Биз дуниядан жабылмайбыз, букъмайбыз, ол угъай, тыш къыралла мында бола тургъан ишлени юслеринден билселе сюебиз. Бусагъатда Россей оюмлу, ырахатлыкъны бла игиликни излегенлени арасы бола турады. Адамла уа минг жылла бла тохташа келген ариу адетлерине, тин-ниет хазналарына таяна жашаргъа излейдиле.