Саугъалаула, алгъышла, жыр-тепсеу да

Бу кюнледе Элбрус районну Къулийланы Къайсын атлы маданият юйюнде Устазны халкъла аралы кюнюн, хар замандача, къууанчлы халда белгилегендиле. Ахыр бир ненча жылдан бери бу кюнде республика район даражада мектепге дери билим бериуде ишлегенлени да ала бла бирге саугъалайдыла. Юйретиучюню кюню 27 сентябрьде белгиленеди.

Алайды да, омакъ жасалгъан Маданият юйге аланы барысын да алгъышларгъа кёпле келгендиле. Ол санда КъМР-ни Парламентини депутаты Сотталаны Къурман Сейитович, Элбрус муниципал районну администрациясыны башчысыны къуллугъун болжаллы халда толтургъан Отарланы Мухтар Магомедович, жер-жерли самоуправленияны председатели Тохаланы Хыйса Мажидович, районну эллерини администрацияларыны башчылары,  окъутуу ишни ветеранлары, ич ишлени,  администрацияны бёлюмлерини келечилери эм журналистле.

 Байрамны эки бёлюмден къурагъандыла. Биринчи кесегин районну Билим бериу управлениясыны келечилери Асадуллаланы Элина бла Фуад Буранов бардыргъандыла. Ала экиси да кезиу-кезиу педагог эмда юйретиучю усталыкъланы магъаналылыкъларыны юслеринден билдириуле эте, сахнагъа эм алагъа  Отарланы Мухтарны чакъыргъандыла. Ол билим бериуге жашауларын жоралагъан, огъурлу адамланы алгъышлап, алагъа адамла  дунияда эм багъалы ёсе келген тёлюню, сабийлени ишексиз ышаннганларын айта, уллу къыйынлары ючюн ыспас этгенди. Сора сахнагъа  Сотталаны Къурманны чакъыргъанды. Ала КъМР-ни Правительствосуну, Жарыкъландырыу эм илму министерствосуну, район администрацияны да сыйлы грамоталары,  махтау къагъытлары бла да устаз къауумну келечилерин саугъалагъандыла.

КъМР-ни Правительствосуну Ыразылыкъ къагъыты  бла билим бериуге салгъан къыйыны,  болдургъан жетишимлери ючюн  Тырныауузну 6-чы номерли школуну китапханасыны ишчиси, сурат ишлеуден устазы Хаджиланы Айшатны саугъалагъандыла.

КъМР-ни Жарыкъландырыу эм илму министерствосуну Ыразылыкъ къагъыты бла КъМР-ни билим бериу системасына салгъан къыйыны ючюн Кёнделенни 4-чю номерли орта школуну таматасыны окъутуу-юйретиу жаны бла орунбасары Улакъланы Марина, Быллымны сабий садыны юйретиучюсю Атаккуланы Джамиля белгиленнгендиле. 

Элбрус районну администрациясыны сыйлы грамоталарын  эм ыразылыкъ къагъытларын  Бийчеккуланы Фатима Ахматовнагъа, Тебуланы Мариям Расуловнагъа, Макъытланы Жулдузхан Борисовнагъа, Улакъланы Мадина Хизировнагъа, Залийханланы Аминат Хасановнагъа, Балаланы Елена Хамитовнагъа бергендиле.

 Тохаланы Хыйса  Элбрус районну жер-жерли самоуправление советини сыйлы грамотасы бла билим бериуге салгъан къыйынлары ючюн  Ёзденланы Анжела Хасановнаны, Жануккуланы Мариям Ануаровнаны, Солтанланы Аминат Таукеевнаны, Байзуллаланы Зухра Алиевнаны, Хамурзова Ирина Гуфрановнаны, Бабаланы Фатимат Азаматовнаны, Алийланы Мурат Солтан-Хамитовични саугъалагъанды.

Атаккуланы Нуржан Манафовна  Элбрус районну билим бериу управлениясыны  сыйлы грамоталары бла Жанатайланы Мадина Хызыровнаны, Ёзденланы Диана Алиевнаны, Оразайланы Феня Лоцевнаны, Лукьянченко Наталья Геннадьевнаны, Атаккуланы Джамиля Магомедовнаны, Хачатурян Эмма Нораировнаны, Балаланы Фатима Эльбрусовнаны, Чыпчыкъланы Джамиля Ибрагимовнаны, Мамайланы Мариям Юсуфовнаны, Къартлыкъланы Заира Зауровнаны, Толгъурланы Джамиля Магометовнаны, Тилланы Халимат Исмайыловнаны саугъалагъанды.

Районну билим бериу управлениясыны таматасыны орунбасары Шахмырзаланы Аслижан управленияны атындан Ыразылыкъ къагъытла бла 

Огъары-Басханны орта школуну коллективтин «Ана тилим, жаным-тиним, дуниям» деген республикалы эришиуде 3-чю жерин алгъанлары ючюн, Тырныауузну 6-чы номерли сабий садыны коллективин а  «Россейни эм иги сабий садлары» деген эришиу къарауда хорлагъанлары ючюн саугъалагъанды.

Окъуу учрежденияны жангы окъуу жылгъа иги хазырлагъанлары ючюн Кёнделенни 1-чи, 4-чю орта школларын, Элбрус элни орта школун, Тырныауузну 5-чи номерли гимназиясын да белгилегендиле.

 Районну билим бериуде ишчилерини профсоюзуну таматасы Джаппуланы Амина,  методистлени кабинетини таматасы Бапыналаны Элина  «2024 жылны эм иги жаш устазы» эм « 2024 жылны эм иги насихатчысы», «2024 жылны эм иги юйретиучюсю» деген атлагъа тийишли болгъан, регион  эм федерал кезиуледе хорлагъан устазла Байзуллаланы Фатима Зейтуновнаны, Мызыланы Марина Махмутовнаны, Сотталаны Жулдуз Исхаковнаны, Хоконова Юлия Анатольевнаны, Князланы Айсурат Маликовнаны, Ёлмезланы Танзиля Масхудовнаны, Балаланы Лейля Ахматовнаны, Черкуянланы Налжан Хусейновнаны, Локияланы   Зухра Махтиевнаны,  алгъышлагъандыла.

 Сахнагъа Отарланы Мухтар бла Атаккуланы Нюржан чыгъып, «2024-чю жылны устазы» деген конкурсну бла «Жюрегими сабийлеге береме» , «2024  жылны эм жаш устазы» деген эришиулни регион эм федерал урумларында болдургъан жетишимлери ючюн Жеттеланы Мадина Сафарбиевнаны, Джаппуланы Лейля Хакимовнаны, Хаджиланы Мариям Тахировнаны, Маргарита Ишхановна Абулькинаны, Александра Львовна Ризаеваны, Жанатайланы Зухра Мухарбековнаны, Байзуллаланы Зарема Малиловнаны, Алина Олеговна Шаованы бла Эфендиланы Зульфия Муслимовнаны сыйлы грамотала,  хорлагъанланы кубоклары бла да саугъалагъандыла.                                                                                                                          

Къонакъла барысы да юйретиучюлени, устазланы да ёсюп келе тургъан тёлюню окъутууда, аслам затха тюшюндюрюуде юлюшлери уллу болгъанын черте, алагъа жангы жетишимле, билимге итиннген окъуучула, саулукъ-эсенлик, мамырлыкъ да тежегендиле. Бюгюнлюкде билим бериуде бола тургъан тюрлениуледен ала да артха къалмай, регионубуз да  мындан арысында да бу бёлюмде болдургъан жетишимлери бла кёллендиргенлей,  турлугъуна ийнадыргъандыла.

Къууанчлы ингирде, белгилегенибизча, аслам устаз бла юйретиучю ишлеринде, тюрлю-тюрлю эришиулеге къатыша, болдургъан жетишимлери ючюн саугъаланнгандыла. Аланы араларында жаш адамла болгъанлары уа бютюнда кёллендирген шартды.

 Байрамны экинчи бмёлюмюн районну маданият бёлюмю хазырлап бардыргъанды.

Андан сора да, жыйылыуну къуралыуун айтырчады. Белгили жырчыларыбыз, тепсеу ансамбльле  да къараучуланы кёллерин жарыкъ этгендиле. Залда олтургъан хар устазгъа уа  гюлле  саугъалагъандыла. Ингир къууанч, той-оюн ахырына жетгенди.