Кёпле электрон квитанцияны сайлайдыла

«Газпром межрегионгаз Нальчик» компания абонентлеге электрон тёлеу документге кёчерге чакъырады. Бюгюнлюкге аны 45 минг инсан хайырланады, деп билдиргендиле аны пресс-арасындан.

Электрон квитанцияны кючю къагъыт документдеча аллайды. Алай аны андан иги жанлары кёбюрекдиле. Биринчиден, электрон квитанция тас болмайды, хайырланыучугъа жетмей къалмайды кеси да. Ол бир заманда келеди, компьютерде, телефонда, планшетде ачылады эмда сакъланады. Быллай квитанция бла талай хайырланыучуну тёлеулерин берирге жарыйды. Къагъыт документле азыракъ болгъанлары себепли, къоранчла азаядыла, экология да игирек болады.

Электрон квитанциягъа кёчерге сюе эсегиз, «Мой газ» приложенияда неда «Газпром межрегионгаз Нальчик» компанияны сайтында (www.mrgkbr.ru) заявка беригиз неда офисде жазыгъыз.

Дагъыда эсигизде болсун: счётчикни кёргюзтюулерин ай сайын 25 кюннге дери жиберирге унутмагъыз. Ансыз тёлеу башха тюрлю тергелликди: биринчи юч айны ичинде орта къоранчха кёре, андан сора уа норматив бла.