Къоркъуулу ауруугъа сакъ болугъуз

Роспотребнадзорну КъМР-де бёлюмюнден билдиргенлерине кёре, бизни республикада Элбрус эмда Зольск районланы тау тийрелеринде эмина чыгъаргъа боллукъду деген къоркъуу дайым сакъланады. Бу аурууну кёбюсюнде жубуранла, сора гылыула, тюлкюле, къоянла эм талай башха жаныуарла жаядыла. Аланы юслеринден битле бла губула адамны юсюне тюшюп къапсала, ол да эминагъа жугъаргъа боллукъду. Ауруулу жаныуарланы сойгъанда, этлерин ашагъанда, терилерин тешгенде да бек уллу къоркъуу чыгъады.

Эминагъа жукъгъан адамны 2-6 кюнден сора териси исси (39-40 градус) болады, аны къолу-саны тюшеди, башы, шаугютлери ачып тебирейдиле, кёлю аман этеди, къусуп башлайды, жукълаялмай къыйналады. Дагъыда кёбюсюнде башы кетип, жюреги къыйнап, териси да чапырып башлайдыла. Эминаны талай тюрлюсю барды, алай къайсысы да игиге келтирмейди.

Бу затха жукъмазча, аллай къоркъуулу жерлеге атланырдан (15-20 кюн) алгъа эминадан вакцинацияны ётерге керекди. Ол тийреледе уа жубуранланы, гылыуланы (сауланы эмда мыллыкларына) къатларына жууукълашмагъыз, ала жашагъан жерледе турмагъыз, жалан аякъ айланмагъыз. Бит неда губу юсюгюзге олтурмаз ючюн, тап кийинигиз, аланы юркютген абериле да себигиз. Эминагъа жукъгъанма деп не аз да ишекли болсагъыз а, медицина учреждениягъа мычымай барыгъыз.