Медицина учрежденияла хайырланыугъа берилликдиле

Нальчикде шёндюгюлю медицина араны къурулушу бошала турады. Саулукъ сакълау министерстводан билдиргенлерича, ол регионда эм уллу поликлиника боллукъду. Бир кюннге анда Нальчикден, республиканы башха шахарларындан бла районларындан жети жюз элли саусузгъа къараргъа жарарыкъды.

Мекям беш къатлыды, жери он минг квадрат метр болады. Бюгюнлюкге анда инженер ызла тартылгъандыла, къурулушчула ичинде ишлени тамамлайдыла. Поликлиникада ачыллыкъ тогъуз багъыу-диагностика бёлюм шёндюгюлю излемлеге келишген, эксперт къауумгъа кирген оборудование бла жалчытылынырыкъдыла. Адамлагъа амбулатор эндоскопия эм онкология болушлукъ этилликди, реабилитация, диагностика эм башха бёлюмле, кюндюзгю стационар ишлерикдиле. Анда хирургия эм эндоскопия операцияланы къауумун этерге да жарарыкъды. Къурулуш «Саулукъ сакълау» миллет проектни чегинде бардырылады, поликлиника хайырланыугъа быйылны ахырына берилликди.

Дагъыда бир медицина учреждение Тёбен Черекде ишлене турады. Жангы амбулатория хайырлыныугъа экинчи жылны ахырында берилликди.  Элни эски амбулаториясы 1950 жылда ишленнгенди, бусагъатдагъы излемлеге келишмейди. Анда саулукъларына юч мингден аслам адам къаратадыла, ол санда сабийле да, деп билдиредиле республиканы Саулукъ сакълау министерствосундан. Бюгюнлюкде ишчиле жангы мекямны къабыргъаларын сюей турадыла. Анда бир кюннге кюндюзгю стационарда бир кереге элли саусузну багъаргъа боллукъду. Къурулуш «Саулукъ сакълау» миллет проектни чегинде бардырылады.