Керексиз «батырла» жууапха тартыллыкъдыла

Россейни Къырал Думасы машиналарын жолда жюрюуге къатышханланы жашауларына, саулукъларына къоркъуу салып жюрютген водительлени жууапха тартыргъа муратлыдыла.  Бу кюнледе депутатла РФ-ни Административ бузукълукъланы кодексине ол жаны бла тюрлениуле биринчи окъулууда къабыл этгендиле.  Думаны башчысы Вячеслав Володин экинчи окъулуугъа жууаплылыкъны къатыландырыугъа бурулгъан жорукъла кийирилликлерин билдиргенди.

 - Тарихле жарсыулудула, жол-транспорт болумланы саны ёсгенлей баралы. 2023 жылда къыралда 132,5 минг авария болгъанды, ол а аны аллында жылдан 4,5 процентге кёпдю. Алада 14,5 минг адам ёлгенди, 166,6 минг инсан а тюрлю-тюрлю жарала алгъандыла. Жолда жюрюуге къатышханланы саулукъларына, жашауларына къоркъуу салгъан водительлени жууапха тартыргъа кереклиси баямды, - дегенди ол.

Законнга кёргюзтюлген тюзетиулеге кёре керексиз «батыр» водительлеге тазир салынырыкъды – 3-5 минг сом. Бузукълукъну къайтарып этгенни уа машинаны жюрютюрге эркинлигин 1 айдан 3 айгъа дери сыйырыргъа белгиленеди. «Алай бу жорукъла энтта сюзюллюкдюле, экинчи окъулуугъа жууаплылыкъны къатыландырыу жаны бла башламчылыкъла этилирге боллукъдула», - дегени Думаны башчысы.

Жолда машинаны башхаланы жашауларына, саулукъларына къоркъуу салып жюрютгенлени жууапха тартыуну юсюнден оюмла 2016 жылдан бери сюзюлгенин айтырчады.  

Депутатла жолда машиналаны араларында кенгликни сакъламагъанланы, бир сылтау болмай, тормозгъа басханланы, шашка ойнагъанча, башха машиналаны араларына киргенлени жууапха тартыргъа белгилейдиле. Законну ангылатыу кесегинде айтылгъаныча аварияланы 80 проценти аллай керексиз «батырлыкъланы» хатасындан боладыла.

 Законопроектни хазырлагъанладан бири – депутат, Урунуу, социал политика эм ветеранланы ишлери жаны бла комитетни башчысы Ярослав Нилов айтханыча, жолда «башхаланы къозутхан, ачыуландыргъан, билип, «шашка» ойнагъанча, жюрюген» водительле аз тюйюлдюле. «Ала башхаланы юйретирге кюрешедиле, алларына туруп, сунмай, тормозну басып», - дейди ол.

Быллай кезиуде уа бир тюрлю терслиги болмагъан водитель жолундан таяды, авариягъа тюшеди. «Быллай усталаны кеслерин юйретирге керекди. Бир-бир тыш къыраллада быллай кезиуде инсанны эркинлиги сыйырадыла», - дейди ол.

Алай артыкъ «жигит» адамла, жарсыугъа, Кавказ регионланы жолларында асламдыла. Къырал Думада Дагъыстандан депутат Абдулхаким Гаджиев жууаплылыкъны эртте окъуна къатыландырыргъа кереклисин белгилегенди. «Жолда кесин къылыкъсыз жюрютюу уллу жарсыуду, бютюнда Дагъыстанда. Хау, ол жолда жюрюуню жорукъларына бузукълукъ этмейди, алай аны хатасындан аварияла боладыла, башха адамланы жашауларына, саулукъларына къоркъуу салынады. Аллай «батырланы» хатасындан ненча адам ауушханды», - дегенди ол.

Россейни правительствосу парламентарийлени башламчылыкъларын къабыл кёргенди.  Болсада кеслерин тюзетиулерин да кёргюзтгенди. Ол санда къырал автоинспекторланы быллай бузукълукъланы ачыкълагъанда эркинликлерин тохташдырыу жаны бла да.