Онкология диспансерни къыстау ишлейдиле

Нальчикде шёндюгюлю онкология диспансерни къурулушу барады. Бюгюнлюкде ол республикабызда саулукъ сакълау жаны бла эм уллу проектледенди.

Диспансер беш уллу бёлюмден къуралады. Бусагъатда аны хирургия бёлюмюне инженер ызла тартыладыла, башы жабылады. «А» эм «Б» бёлюмлерини отоулары жарашдырыладыла, радиология бёлюмюню къабыргъаларын сюегендиле, аны да башын жабадыла. Саусузланы алгъан эки бёлюм да ишленнгендиле.

Диспансерде эки жюз элли адам жаталлыкъдыла, кюндюзгю стационарда – отуз, поликлиникасында уа бир сменнге жюз саусузгъа къараллыкъды. Хирургияда операцияла алты залда этилликдиле, дагъыда эки гитче операционный боллукъду. Багъыу учреждение шёндюгюлю излемлеге келишген бийик технологиялы оборудование бла жалчытыллыкъды. Анда диагностика бла терапевтика жумушладан сора да, багъыуну эндиге дери республикабызда болмагъан жангы тюрлюлеринден да бардырлыкъдыла. Битеу бу иш «Саулукъ сакълау» миллет проектни чегинде тамамланылады.