Шуёхлукъ сезимлени айныта

Къабарты-Малкъар къырал университетде Отарланы Керим атлы Малкъар маданиятны арасы къурап эрттеден сакъланнган «Биринчи курсчуну дебюту» деген байрам болгъанды. Жыл сайын бардырылгъан байрамгъа быйыл 100-ден артыкъ студент къатышханды.    

Мында жаш адамла бир бирлери бла танышып, фахмуларын да ачыкълар онг табадыла. Студент къарындашлыкъда, шуёхлукъда жашаргъа юйренедиле. Ала кёп тюрлю миллетли сабийле болгъанлыкъгъа, хар бири кеси динлерине табыннганлыкъгъа, бир бирлерини маданиятларына , тиллерине бла динлерине уллу хурмет этедиле.

Байрамны малкъар маданият араны таматасы Байтуугъанланы Исмайыл ачханды. Ол студентлеге жашауда бизни онгдурлукъ, алгъа элтирик, муратларыбызгъа жетдирлик билим бла адамлыкъ болгъанын эсгертгенди. Миллетибизни эрттеден келген адетлерин бла тёрелерин сакъларгъа борчлу болгъаныбызны унутмазларын да тилегенди. Аны айнытыр ючюн а, бу арада алагъа хар заманда ыразы болуп тюбериклерин, не жумушларына да сюйюп болушурукъларын чертгенди. Жаш адамла, къайсы бёлюмде окъусала да, аланы барын да бирикдирген халкъына, миллетине, маданиятына, тилине сюймеклик болгъанлай къаллыгъын хар заманда да эслеринде тутсала сюйгенин да билдиргенди.

Байрамны жаш артистле Нурлан Джамалдинов, Ботталаны Алий бла Таукенланы Эльдар аламат жырлары бла жарытхандыла.

Биринчи курсчу студентле, къауумлагъа юлешинип, фольклорну бла тёрелени, адетлени юслеринден къуралгъан соруулагъа жууапла берип эришгендиле. Жашла «Алан билек» оюнда кючлерин сынагъандыла. Къызла да юй жумушда не къадар мадарымлыла, жигитле болгъанларын эришиуледе кёргюзтгендиле.

Байрамны ахырында хорлагъан юч къауумгъа арадан махтау къагъытла бла эслеринде сакъланырча саугъала да бергендиле.

- Мени оюмума кёре, быллай тюбешиуле жаш тёлюню арасында бек керекдиле. Сабийлени алыкъа школда, абадан класслада окъуй тургъан заманларында окъуна бирлешип, бирге болуп ишлерча юйретирге керекди. Сабий кесине, абадан адамгъача, эс бурулгъанын сезсе, ол къадар жууаплы, ишине кертичи, тынгылы болады. Биз да ол мурат бла, биринчи курсда окъуугъа энди кирген, элледен келген жашланы эмда къызланы бирикдирип, не аламат огъурлу ишни да бирге бардырырча амалла къурайбыз, мында ал кеслери жангыз болмай, шуёхлары, нёгерлери болгъанларын да билселе сюебиз, - дейди Байтуугъанланы Исмайыл.