Ауруу жайылмазча

Прохладна районда Екатериноградская элни къатында юйретиуле бардырылгъандыла. Аны Къабарты-Малкъарны Ветеринария управлениясы къурагъанды, Россельхознадзор, муниципалитетни администрациясы, республиканы Табийгъат байлыкъла эмда экология министерствосу, МВД, МЧС да себеплик этгендиле.

Юйретиулени магъанасы – тонгузлагъа жукъгъан африкалы эмина чыкъгъанда, тюрлю-тюрлю ведомствола бирге къалай ишлерге керек болгъанларына тюшюнюудю. Аны чеклеринде специалистле билген информацияларын, этилирге тийишли жумушланы да эсге тюшюргендиле, бегирекда терк къармашыргъа юйреннгендиле.

Бу ауруу республиканы тийресинде чыкъмазча эмда жайылмазча Ветеринария управление, сагъынылгъан министерство бла бирге тинтиуле бардырып турадыла. Аланы кезиуюнде (къабанладан) пробала алып, лабораторияда тинтиуле бардырадыла. Быйыл аллай эмда силегей (ящур) ауруулагъа 34 пробагъа къаралгъанды: алада заранлы затла табылмагъандыла.