Эсде къаллыкъ сагъышландыргъан суратла

Къабарты-Малкъарны жюзжыллыгъыны паркында «Мартеманчелло. Арт-ушакъла: санат чекледен тышында» деген аты бла кёрмюч ётгенди. Анда шёндюгюлю суратлау искусство бла кюрешгенлени ишлерин кёргюзтюлгендиле. Кёрмючде суратлау искусствогъа жангы кёзден къараргъа, жаш суратчыланы усталыкъларына багъа бичерге онг болгъанды. Ол маданият башламчылыкъланы Президент фондуну себеплиги бла къуралгъанды. 

«Мартеманчелло» проектни башчысы Замир Кибишев айтханыча, ала ишлерин Москвада башлагъандыла. «Анда талай кёрмюч къурап, жамауат анда салыннган суратланы жаратханын, аны юсю бла жаш авторланы ишлерин кёргюзтюрге онг чыкъгъанына тюшюннгендиле. Бу жангычылыкъны хайырындан президент грантны алгъанбыз. Москвада жаш адамла клубланы, барланы орунларына келирча майдан къураргъа сюе эдик. Муратыбыз санат жаш адамлагъа да сейир болурча, ала кёрмючлеге аслам келип башларча этергеди», - дегенди ол

Экспозицияда кавказ суратчыланы отуз жети ишлери кёргюзтюлгенди. Кёрмюч алгъа Дербентде къуралгъанды, хар жангы шахарда, аны энчиликлери эсге алынып, жангы чыгъармала къошуладыла. Проектни жангычылыкъла жаны бла башчысы Линда Кесаонова айтханнга кёре, мында кёрмюч паркда болгъаны ючюн аны ала энчи къууатын кючлерге сюйгендиле. Ол мурат бла жарыкъ тюрсюнле, гюлле хайырланылгъандыла, айтхылыкъ адамланы сёзлери жазылгъандыла.

 Кёрмючню ачылыууна уа республиканы жырчылары, тепсеучюлери, блогерле да келген эдиле, жер-жерли дизайнерлени миллет белгиле бла жасалгъан кийимлери да кёргюзтюлгендиле. Суратланы юсюнден айтханда уа, къараучула барысы да ала алларына келгенлени сагъышландыргъанларын бирча белгилегендиле. Жылны ахырына дери уа быллай экспозицияла Владикавказда бла Москвада да боллукъдула.