Сабийлеге эллиге жууукъ операция этилликди

Бирде сабийни халын игилендирирча хирургия болушлукъ изленип да къалады. Аны саусуз балагъа тапдырырча уа бир медицина организацияны кючю азлыкъ этерге боллукъду. Къыйын ауруулары, айныуларында энчиликлери болгъан балалагъа болушур, аланы эм жангы технологияланы себепликлери бла регионну ичинде багъар мурат бла республиканы Кёп профильли сабий клиника арасы мадарла этеди.
 
Аны бла байламлы «Ышарыуну саугъалайбыз» халкъла аралы жандауурлукъ фонд араны мурдорунда энчи акцияны бардыргъанды. Фондну башчысы Хасан Баиевни башламчылыгъы бла Беларуссиядан, Тюркден, Узбекистандан, Россейни Уфа, Москва, Владикавказ, Грозный, Черкесск, Нальчик шахарларындан аууз-бет эм пластика хурургия жаны бла специалистлени къаууму бу жаны бла ауруулары болгъан эмда операция керекли сабийлеге консультацияла бардыргъандыла. Араны пресс-службасындан билдиргенлерине кёре, врачла Наиля Давлетшина, Дмитрий Гричанюк, Рита Мазлакова, Сюзанна Алхасова, Умар Осмаев, Али Риза Эркочен, Осман Акдаг, Олег Дабагов, Темур Ражаматов, Евгений Думенко, Арман Байжуманов, Ахсарбек Цзидоев, Асият Джанабекова, Роза Актиева, Ирина Дворовских, Маргарита Яценко эллиге жууукъ операция да этерикдиле.