Сабийле «Телемеханикада» болгъандыла

Бу кюнледе сабий къауумгъа «Телемеханика» заводха экскурсия бардырылгъанды. Аны Россейни Машинала ишлеучюлерини союзуну регионда бёлюмю, «Жолоучулукъну академиясы» деген сабий туризм ара эмда республикада ГАИ-ни Управлениясы къурагъандыла.

Заводда гитче къонакълагъа бу предприятияны тарыхыны, анда чыгъарылгъан затланы юслеринден хапарлагъандыла, къаллай усталыкъла изленнгенин да билдиргендиле. Экскурсияны кезиуюнде сабийле цехледе светофорланы, электрокючню эсеплеген, тёгерекни жарытхан приборланы, буз булутланы чачхан установкаланы эмда башха затланы жарашдыра тургъанланы ишлерине бек уллу сейир этип къарагъандыла. Аланы ишлерин кеслери кёзлери бла кёргенлери ючюн, сора заводну таматалары эмда специалистлери бла да сёлешгенлерини хайырындан техникалы эмда инженер усталыкъланы юслеринден толуракъ шагъырей болгъандыла, республиканы промышленность жаны бла онгларына тюшюннгендиле.

Быллай экскурсияланы бир жаны бла промышленность туризмге санаргъа да боллукъду, дейдиле аны къурагъанла. Шёндю бизни къыралда ол терк айный баргъан ишди, сабийлени жер-жерледе промышленность онгла бла шагъырейлендириу да ары киреди.