Алгъадан къайгъырыулукъ кёп палахдане сакълайды

Нальчикде тамата классланы  юч жюзге жууукъ окъуучусу жолда жюрюуню жорукъларыны юсюнден тренингге къатышхандыла.

Бу кюнледе Нальчикни 2-чи номерли лицейинде республиканы Къырал автоинспекцияны келечилери абадан классланы окъуучулары бла тюбешгендиле. Бу  тренинг республикада бардырылгъан «Сынамсыз водитель» деген жумушну чеклеринде болгъанды. Окъуучуланы алларында МВД-ны Къырал автоинспекциясыны КъМР-де Управлениясыны тамата инспектору  тамата лейтенант Заур Балкаров сёлешгенди. Эм алгъа ол, аварияла болгъан жерледе алыннган видеоланы кёргюзтгенди. Сора  уллу кёллюлюк бла кеслерин терс жюрютюу неге келтиргенин окъуучула бла бирге сюзгенди. Бу жарсыулу ишледе акъылбалыкъ болмагъан, окъуучуланы да терсликлери болгъанын, ала жолда кеслерин жюрюте билмегенлерини хатасындан бирлени жашаулары юзюлгенин, бирле уа ёмюрлерини ахырына дери сакъат къалгъанларын да чертгенди.

Жаш тёлюге бла акъылбалыкъ болмагъан сабийлеге машинала жюрюген жолну белгиленмеген, ётерге жарамагъан жерледе ётюу бек къоркъуулу болгъанын да чертгендиле. Керекли къагъытлары бла эркинлиги болмай, машина сюрюрге жарамагъанын да эсгертгендиле.

Юлгюле келтире, автоинспектор жаяу жюрюгенлени жолну ёте туруп этген терсликлерин бла халатларын суратлада кёргюзтгенди. Аны бла бирге, кеслерини, башхаланы да жанларына къоркъуусуз болурча, жолну  къалай тюз ётерге кереклисин къайтарып ангылатханды.

Тюбешиуде сёз жолда жюрюуню жорукъларын бузгъанланы жууапха тартылыуларыны юсюнден да баргъанды. Акъылбалыкъ болмагъанланы рульгъа олтуруу нечик уллу къоркъуу келтиргенин, андан сора да, ала  жууапха тартыллыкъларын да белгилегендиле.

-Энди акъылбалыкъ болмагъанланы рульгъа олтурлукълары келгени ол жангылыкъ тюйюлдю.  Юйюрде бир ненча машина бар эсе уа, бютюнда. Алай  жаланда бир жангылыч, сабийни, жаш адамны да жашауун толусунлай тюрлендирирге боллукъду. Аны себепли, рульгъа олтурургъа ашыкъмасала иги боллукъду. Биринчи автошколда окъуп, сынауладан ётюп, эркинлик къагъытланы  къолгъа алып, андан сора да, шахардан, адамла жашагъан жерледен узакъда бираз сынам алып, кесигизге ышана башлагъынчы, машина сюрюрге ашыкъмагъыз,-дегендиле ушакъда  инспекторла.

 Тюбешиуде окъуучула соруула бере, алагъа кеслери тюз жууапла да излей, сюзюу халда кенгешгендиле. Сорууланы кёбюсю уа  жоллада тюбеген терс эм къыйын болумла бла байламлы эди.

Тренингни ахырында Къырал автоинспекцияны келечилери окъуучуладан жашауларын къоркъуулу болумлагъа тюшюрмей,  башхалагъа да къайгъыра, жоллада кеслерин жорукълагъа кёре жюрютюрлерин тилегендиле. Магъаналы тюбешиу шуёхлукъ халда ётгенди.