Къайда да намысына сакъ эди

Яникой элден кёп жигит жашла чыкъгъандыла. Совет Союзну Жигити Байсолтанланы Алимни аты саулай къыралгъа белгили эди. Залийханланы Магомет, Къойчуланы Иосиф бек сыйлы саугъала бла - Къызыл Байракъны орденлери бла – саугъаланнгандыла. Аладан сора да, къыралны аллында борчларын намыслы толтургъан яникойчула аз тюйюлдюле. Сарбашланы Матгерийни жашы Хажи да аладан эди.

Аны аскерге 30-чу жылланы ахырында чакъыргъан эдиле. 85-чи чекчи отрядда къуллукъ эте тургъанлай, Финляндия бла уруш башланнганды. Анга къатышханланы хапарларына кёре, финле бла уруш этген бек къыйын болгъанды. Сууукъла 40-45 градусха дери жетгендиле. Ма аллай кюнледе пулемётланы терен къарда чанала бла тартып, акъ финле бла уруш этгенди Сарбаш улу. 

Полковой школну бошагъан сержант Сарбашланы Хажи пулемётчуланы отделенияларыны командири болгъанды. Немисли аскерле бла урушда этген жигитлиги ючюн Ата журт урушну экинчи даражалы ордени бла саугъаланнганды.

1943 жылны жаз башында ол ауур жаралы болады. 1832-чи эвакогоспитальгъа тюшеди. Андан сора аскер къуллукъгъа жарамагъаны себепли, юйге жиберилген эди. Башха фронтчула, юйюрюне Орта Азияда къошулгъанды.

 Гвардиялы сержант, жигит пулемётчу мамыр жашауда да гвардиячылай къалгъанды. Белгилисича ишни къыйыны, тынчы деп къармай, кесине айып алмай уруннганды: буюрулгъан жумушну толтурмай къоюуну бедиге санагъанды. Ишине кёл салмагъан адамны жамауатда намысы хазна жюрюмегенди. Хажини уа ариу кёргендиле, хурмет этгендиле. Кёчгюнчю болгъанына да къарамай, сабанчы бригадагъа таматалыкъ этерге салгъан эдиле. Тынг жерлени хайырланыугъа къатышханы ючюн СССР-ни Баш Советини Президиумуну 1956 жылда 20 октябрьден Указына тийишлиликде «За освоение целинных земель» майдал бла сагъаланнганды. Майдалны анга экинчи жыл 27 апрельде берген эдиле. Ол жыл а Сарбаш улу дагъыда бир урунуу саугъа алгъанды – «За трудовую доблесть» деген майдалны. Шагъатлыкъ къагъытха СССР-ни Баш  Советини Президиумуну Секретары А.Горкин къол салып турады. «За доблестный труд в Великой Отечественной войне 1941-1945гг.» майдал бла СССР-ни Баш Советини Президиумуну 1945 жылда 6 июньдан Указы бла саугъаланнганды.

Кёчгюнчюлюкден къайтхандан сора Сарбаш улу туугъан элинде колхозда звено башчы, бригадир, колхозну председателини орунбасары болуп да ишлегенди. «Урунууну ветераны» майдалны да Хажи ёхтемлик бла жюрютгенди. 

Пенсиягъа чыкъгъандан сора да, Хажи бош турмай, элни жамауат жашаууна тири къатышханды. Бюгюнлюкде да эллилери аны иги бла эсгередиле.  Къызы Роза да кёп жылланы Эл советде, школда да ишлеп келгенди. Бюгюнлюкде ол огъурлу ыннады.