Къыйын жашау болумлагъа тюшген сабийлеге болушлукъгъа

КъМР-ни Кёп функциялы жаш тёлю ара къурагъан къыйын халлы акъылбалыкъ болмагъан жаш тёлю бла ишлеу жаны бла «Мен-насийхатчы» деген комплексли проектни 3-чю кезиую ётгенди.

Араны медиа проектлери эм муниципал къуралыулада жаш тёлю бла ишлеу жаны бла баш специалисти Атмырзаланы Аминат билдиргеннге кёре, бу проектни ала озгъан жылны май-ноябрь айларында бардыргъандыла. Ол «Развитие системы поддержки молодёжи «Молодёжь России» деген федерал проектни чеклеринде тамамланнган жумушду. Бу ишге КъМР-ни Жаш тёлюню ишлери жаны бла министерствосу да болушлукъ этгенди.

 - Проектни баш борчу къыйын социал  болумгъа тюшген акъылбалыкъ болмагъанла бла ишлеу, аланы юйретиуде жангы 

амалланы хайырланыу, ала ол болумдан чыгъарча онгла къурау эди. Аны жашауда бардырыу 4 кезиуге бёлюнюп ётгенди, - дейди Аминат Расуловна.

Быйыл бу проектни ишине акъылбалыкъ болмагъанланы аталарын бла аналарын да къатышдырыр онгла къуралгъандыла. Биринчи кезиуде, былтырча, насийхатчыла, юйретиучюле болургъа сюйгенлеге деп энчи ючкюнлюк семинар  бардыргъандыла. Алада лекцияланы психологла, социологла окъугъандыла,  къыйын сабийле бла ишлеу жаны бла къаллай амалла бар эселе да, аланы барысы бла да шагъырей этерге кюрешгендиле.  Андан сора да,  насийхатчыла, энчие эмда  юйюр дегенча къауумлагъа юлешиннгендиле. Жангы келгенлени сабийле бла энчи ишлерге юйретгендиле, былтыргъы насийхатчыланы уа- юйюрле бла ишлерге. Ала бир-бирлери араларында къаты байламлыкъ жюрюте, кёп затха юйреннгендиле.

Энчи эс программада бюгюнлюкде жаш тёлюню арасында кенг жайылгъан затлагъа, аланы психологияларына, сёз болууну сылтауларын сюзюуге   бёлюннгенди. Насийхатчыланы билимлерин ёсдюрюу  жаны бла «Профилактика девиантного поведения несовершеннолетних» деген темагъа энчи курсла да бардырылгъандыла. Ызы бла юйретиучюлени хар бирине да къыйын сабийлени бирерин берип, ала ишлерин андан ары бардырыр онгла къуралгъандыла.  Андан сора да,  ПДН бла КДН службаланы келечилери бла тюбешиуле, ышаныулу ушакъла да ётгендиле. Мындан ары да ала бла келишип, быллай сабийле бла  ишлер амалла къураргъа деп келишгендиле.

- Проектни 3-чю кезиую кёп болмай Герпегежде, табийгъатда орнатылгъан чатырла лагери къуралып, ётгенди.  Юйюрлени бла юйюр насийхатчыланы бирлешип, тюрлю-тюрлю жаш тёлю проектлеге, байрамлагъа, эришиулеге да къатышыр онглары болгъанды. Алай бла эки жаныны араларында байламлыкъла тохташдырылырча амалла къуралгъандыла. Ала бла психолог Будимир Нагоев да тюбешгенди. Юйюрле, насийхатчылача  саулай да районладан чакъырылгъан эдиле. Алагъа берилген насийхатчыла да ол райондан болгъандыла. Бир бирлерин эркин, жууукъ сезерча, ол амалны тюзге санагъандыла проектни къурагъанла, - дейди Атмырзаланы Аминат.

Чатыр лагерьде солуу кезиу бошалгъандан сора, хар юйюр да эки тюрлю номинациялада - «Бек жарашыулу юйюр», «Эм тири юйюр» саугъаланнгандыла.

Элбрус райондан да бир юйюр къатышханды бу проектни ишине. Башда айтханыбызча, районну кесинден насийхатчы да болгъанды биргелерине. Ол жумушну быйыл да Холамханланы Алина жалчытханды.

-Бу проектни ишине къатышыуда ётген эки кюнюм, мени мындан ары да бютюн кючюмю салып, къолумдан келгенича къыйын жашау болумлагъа тюшген, акъылбалыкъ болмагъан сабийле бла ишлеуге болушлукъ этерге кёллендиргенди.  Байламлыкъда ишлеген юйюрню манга чексиз ышаныуун кёрген, керти да тюз ишни  жолунда баргъаныма ийнандырады. Ол андагъы юйюрле саулай да проектни ишин тюзге, кереклиге санай эдиле.

«Мен-насийхатчы»-деген проект  эм сюйгенлеримден бири болгъанын кесиме дагъыда бир кере ачыкълагъанма,-дейди Холамханланы Алина.