Банкда ачыкъ эшиклени кюню боллукъду

Россейни Банкыны Къабарты-Малкъарда бёлюмю ачыкъ эшиклени кюнюне чакъырады. Финанс учреждение аны саулай къыралда жетмиш шахарда бардырыргъа умутлуду, ол санда Нальчикде да. Бизде бу жумуш Лермонтов атлы орамда 14-чю номерли юйде бардырыллыкъды.

Ары келген къонакълагъа банкны келечилери лекцияла окъурукъдула, мастер-классла бардырлыкъдыла, шёндюгю сервислени, цифралы сомну, интернетде къоркъуусузлукъну, инфляцияны юсюнден кёп магъаналы зат айтырыкъдыла, ахчаны тарыхы бла шагъырейлендирликдиле, аланы жюрюуде хазна болмагъан темир эмда къагъыт тюрлюлерин да кёргюзтюрюкдюле.

Къонакъла банк оборудование къалай ишлегенин кеслери кёзлери бла кёрюрге боллукъдула, ахчаланы керти эмда жалгъан тюрлюлерини арасын айыра билликдиле. Интеллект оюнланы сюйгенлени уа финанс тематикагъа викторинала эмда конкурсла сакъларыкъдыла.

Дагъыда «Заман эмда ахчала» суратлау кёрмючде темир эмда къагъыт ахчаланы чыгъарыу неден башланнганын билирге, шёндюгю амалла бла шагъырейленирге онг боллукъду. Къабарты-Малкъарны банк системасыны тарыхындан сейир хапарла да айтыргъа дейдиле ары келгенлеге.

Алайды да, ачыкъ эшиклени кюню 28 сентябрьде ётерикди. Ары тюшер ючюн,  аллындан окъуна бу сайтда жазылыргъа керекди: https://www.cbr.ru/openday/form/?OpenDayBooking.CityCode=nal. Таматала паспорт бла келсинле, 14 жыллары толмагъанланы уа ала бла бирге жиберирге боллукъдула. Сорууу болгъан 8 (8662) 49-22-22 номер бла сёлешсин.