Аш-азыкъ чыгъаргъан предприятияла - халкъла аралы кёрмючде

25 сентября, 2024 - 08:25

Къабарты-Малкъарда аш-азыкъ чыгъарыу бла кюрешген талай предприятие эмда энчи предприниматель бу кюнледе Москвада бардыргъан халкъла аралы «WorldFood Moscow 2024» кёрмючге къатышып келгендиле, деп билдиргендиле «Мени бизнесим» арадан.

«WorldFood Moscow 2024» – ол аш-азыкъ чыгъарыуда алчы компанияла жыйылгъан кёрмючдю. Быйыл анга 28 къыралдан эмда Россейде 60 региондан 1100 предприятие эмда сатыучу къатышхандыла, продукцияларыны къадар тюрлюлерин кёргюзтгендиле.

Алгъын жылладача, шёндюгю жыйылыуну ишчи программасы бек бай эди: тёрт бёлюм, жарым жюзден артыкъ жумуш, алагъа эки жюзден артыкъ эксперт, компанияланы башчылары, спикерле къатышхандыла. Къабарты-Малкъардан а ма была болгъандыла анда: «Нальчик-Сладость» бла «Сириус-М» («Picanto») предприятияла, сора энчи предпринимательле Рустам Жабалиев («MILI MG WATER») бла Аубекир Хожаев («BEKICH»). Ала алыучула бла хайырлы ушакъла бардыргъандыла. Аланы бу кёрмючге къатышыу бла байламлы къоранчларын «Мени Бизнесим» ара жапханды.

Улбашланы Мурат хазырлагъанды.
  • 38 просмотров
Поделиться: