Инфляция артыкъ тюрленмегенди

Быйыл августда Къабарты-Малкъарда инфляция саулай къыралда орта кёрюмдюге жетмей, 8,1 процент болгъанды, деп билдиргендиле Россейни Банкыны бизни республикада бёлюмюнден.

Бу кёрюмдю СКФО-да, битеу къыралда да эм азладан бириди. Алай дагъыда, багъала ол сагъынылгъан мардагъа кётюрюлюрюне сатыуда аш-азыкъ продукцияны талай тюрлюсю азыракъ болгъаны, аны чыгъаргъан предприятияланы эмда ташыу бла кюрешген биригиулени, сора дагъыда жумушла бла жалчытхан организацияланы къоранчлары ёсгени себеплик этгенди.

Сёз ючюн, жай исси болгъаны ючюн хобустаны бла нашаланы тирлиги бир-бир регионлада азайгъанды, аны хатасындан а багъала да кётюрюлгендиле. Дагъыда эл мюлк предприятиялада иш хакъланы тёлерге, урлукълагъа, сугъарыугъа, семиртгичле сатып алыргъа къоранчлары ёсгендиле.

Андан сора да,  татлы ашарыкъланы, сютню эмда андан жарашдырылгъан продукцияны багъалары ёсгендиле. Предприятиялада специалистле жетишмегени ючюн, иш хакъланы да кётюрюрге тюшгенди.

Дарманланы багъаларыны ёсюую уа тохташыракъ болгъанды. Фармацевтика компанияла ишлерин тирилтип, быллай продукцияны асламыракъ чыгъарып башлагъандыла. Сатыу-алыу сетьле бардыргъан акцияланы хайырындан жууучу затланы багъалары да тюшгенди.

Быйыл биринчи августдан башлап, къыралдан тышына отлукъну сатыугъа чек салыннганды. Аны хайырындан ич рынок толусунлай жалчытылынады, бензин да алай терк багъа болмайды.

Россейни Банкыны тергеулерине кёре, келир жылда бизни къыралда инфляция 4-4,5 процент боллукъду, андан арысында да ол чекледе турлукъду.