Юйню неда дачаны къайда сюерге жарайды?

Юй неда дача салыргъа умут этип, жер излей эсегиз, ол сиз сайлагъан участкада къурулуш бардырыргъа жарагъанын да билигиз. Аны къайгъысын этмесегиз, сиз сюеген журтну эркинликсиз орнатылгъаннга санап, аны оюп кетерирге борч саллыкъдыла.

Жерни сатып алырдан алгъа билигиз

Аны категориясын: ол аны неде хайырланыргъа жарагъанын кёргюзтеди. Жашау журтну неда дачаны жаланда экисинде сюерге къоярыкъдыла:

- эл мюлк жерде;

- эллени тийрелерине кирген жерледе.

Эркинлик берген къагъыт ол категорияны толуракъ ачыкълайды. Аны да кёп тюрлюсю барды, юй неда дача ишлерге уа ючюсю келишеди:

- энчи жашау къурулушха (ИЖС) жараулусу – элледе жерле;

- элледе иели мюлкге (ЛПХ) жараулу тюрлюсю, эл мюлк жерледен башхалары;

- бахчачылыкъ бла кюреширге (СНТ) тийишлиси, эл мюлк жерледен башхалары.

«Бахчачылыкъ бла кюрешиу» эмда «Бахчачылыкъ» - ол эркинлик берген къагъытны башха-башха тюрлюлеридиле. Биринчисине кёре ол жерде солургъа, сора жемиш тереклени эмда наныкъ юлкюлени кесинге ёсдюрюрге жарайды. Экинчисинде уа – жаланда эл мюлк бла кюреширге къоярыкъдыла. Юй неда дача салыргъа уа угъай.

Къайда билирге боллукъду?

Жерни неде хайырланыргъа жарагъаныны юсюнден Росреестрни ачыкъ кадастр картасында билликсиз. Аны ючюн абери тёлерге керекмейди.

Дагъыда сатыучудан ЕГРН-ден выписка кёргюзтюрюн излегиз. Анда ма бу затла жазыладыла:

- жерни неде хайырланыргъа жарагъаны;

- чеклениуле;

- кадастр багъасы;

- участканы ёлчеми эмда чеклери.

Тапсыз хайырланнганлагъа – тазир

Категориясы анга келишмеген жерде къурулуш ишлени бардырыу – аны тапсыз жумушлада хайырланыугъа саналады. Аны ючюн а тазир саллыкъдыла:

- жерни кадастр багъасындан 0,5-1 процентин;

- аллай багъасы тохташдырылмагъан эсе – 10-20 минг сом.

Бузукълукъну Росреестр табарыкъды; ол участкаланы дайым тинтгенлей турады.