Бал чибинчиликни тамблагъы кюню чууакъды

Бизни къыралда неллай бир бал чыгъарылгъанын Россельхозбанк тинтгенди. Бу финанс биригиуню аны бла байламлы материалында айтылгъаннга кёре, балны эм уллу кесеги (94%) иели мюлкледе жарашдырылады.

Быллай мюлклеге бал чибинчилик – ол, эм биринчиден, файда келтирген ишди. Аны бла кёл салып кюрешсе, этилген къоранчла экинчи жыл окъуна къайтадыла, ишни файдалыгъы уа 30 процентге жетеди, дейдиле экспертле.

Быйыл балны - 32 процентин Приволжск федерал округда, 26 процентин - Ара, 14 процентин а Къыбыла округлада жарашдыргъандыла. Дагъыда шимал регионлада бал чибинчиле онюч процент къошумчулукъ этгендиле. Алай мюлклени асламысы уа аграр регионладады.

Не сейир, битеуроссей рейтингде Шимал Кавказны юлюшю бир процентге окъуна жетмейди. Къабарты-Малкъарны юсюнден айтханда, бизде бу иш бла, башха жерледеча, кёбюсюнде иели мюлкледе кюрешедиле. «Тергеулерибизге кёре, республикада жыл сайын 60-70 тонна бал жарашдырылады. Районла бла шахар округла ачыкъ этген кёрюмдюле да анга шагъатлыкъ этедиле. Бизни мюлк а быйыл 24 тонна бал чыгъаргъанды», - дегенди «Ципинов Групп» предприятияны башчысы Оздемир Ципинов.

Сагъынылгъан банкда айтханларына кёре, быйыл Россейде 64 минг тонна бал жарашдырыллыкъды. Ол былтыргъы кёрюмдюден артыкъ башха болургъа ушамайды. Аны тыш къыраллагъа сатыу а ёсгенлей барлыкъды: быйыл ол беш минг тоннадан артыкъ боллукъду, аны тёртден бирин Къытай сатып аллыкъды.

«Тирлик иги болурунда бал чибинлени къыйынлары уллуду. Таза ашлагъа сурам ёсе баргъаны, жангы амалла, онлайн сатыу-алыу айныгъаны да бу бёлюмню келир жыллагъа сыфатын къурарыкъдыла. Балны кёпле сюйгенлери ючюн аны жалгъан тюрлюсюн этиу тёре да кетмейди. Алай тийишли законнга тюрлениуле кийирилселе эмда бёлюмге шёндюгю амалла сингдирилселе, бал чибинчилик ахшы кёрюмдюле бла къууандырлыкъды», - дегенди Россельхозбанкны келечиси Наталья Худякова.

Банкны тергеулерине кёре, шёндю бизни къыралны инсанлары бир жылгъа жарым килограмм бал ашайдыла. Алай бу кёрюмдю жыл сайын 3-5 процентге кёбейип барыргъа боллугъун белгилейдиле.