Энчи счётланы ёлчеми асламыракъ болгъанды

Къабарты-Малкъарда быйыл биринчи июльгъа, эскроу-счётланы ёлчеми 2,5 кереге кёбейгенди, деп билдиргендиле Россейни Банкыны бизни республикада бёлюмюню пресс-службасындан.

Алай бла быллай счётланы ёлчеми 713 болгъанды, аланы кеслеринде да 2,2 миллиарддан аслам сом жыйылгъанды. Сёз ючюн, былтыр жаланда 249 счёт (607 миллион сом) бар эди, деп эсгергендиле банкны бёлюмюнде.

Проект финанс система кийирилгенли бери Къабарты-Малкъарда 63 эскроу-счёт борчларын толтуруп жабылгъандыла. Алагъа кёре къурулуш организацияла бир миллиарддан аслам сом къоллу болгъандыла. Дагъыда эки миллиарддан аслам сом багъасына кредит келишимле этилгендиле.

Эскроу-счёт деген не зат болгъанын эсигизге салайыкъ. Талай жыл мындан алгъа къуралгъан амалды ол. Тюзюрек айтханда уа, излемди, дейик. Анга кёре,  энди кёп фатарлы юйню анда жашарыкъланы ахчаларына ишлеген заманда  инсанла эмда организацияла тёлерик юлюшлерин жаланда банкда эскроу-счёт ачып,  алай жыяргъа эркинлик бериледи. Юйню къурулушун а компания кеси ырысхысына неда кредит алып бардырады. Жашау журт битип, аны хар неси да хазырды, тапды, ол хайырланыугъа берилгенди эмда Жеринден тепдирилмеген мюлкню бир къырал реестрине эсепге тюшгенди деген информация берилсе банкга, къурулушчугъа ол счётда жыйылгъан ахча кёчюрюледи.

Бу амалны хайырындан кёп алдауладан бла даулашладан къутулургъа боллукъду. Къурулушну бардыргъан компанияла уа ишлерин терк эмда тынгылы этерге кюреширикдиле. Дагъыда бир игиси – эскроу-счётда сакъланнган ахча (10 миллион сомгъа дери) вкладланы страхованиясын этиу Агентствону къоруулауундады.