Туугъан журтларына солургъа келедиле

Оруслу жаш Алексей Новиков - Нальчикде, Цийкъанланы Зейтун-Огъары Малкъарда туууп ёсгендиле. Экиси да мени хайырымдан танышхандыла.  Энди бир ненча жылны, кюз артыны чууакъ кюнлеринде, республикагъа солуу кезиулеринде келедиле.

Алексей   юй бийчеси Татьяна бла машиналары бла Пензадан бери, 1200 километрни, алай келиучюдюле. Зейтун а Москвадан самолёт бла биздеги аэропортда къонуучуду.

Бу эки жашны хайырындан жылгъа бир кере республикада жылы суулада жууунургъа, ариу табийгъаты болгъан айбатлы жерлерибизде энтта  бир кере чыгъаргъа онг табылады.  Оруслу, таулу жашланы  да туугъан жерлерине сюймекликлери бир кибикди. Алексей атасыны, анасыны къабырларын ариулаучуду. Зейтун да  жууукълагъа айланып чыгъар.

Жашла  республикада жолла тап болгъанларын, жангы журтла ишленнгенлерин да уллу ыразылыкъ бла айтдыла. Бизде ёсген алмала, помидорла ала жашагъан шахарладан эсе багъаракъ  болгъанларын а  ангылаямайдыла. Къайда татыулу хычинле бла шишликле этилгенин а,  алача,  мында жашагъанла да биле болмазла.

Аушигердеги жылы суулада жуууннганлай, Алексей Къашхатаугъа кирген жерде Къазакъланы Батырны кафесине кирлигибизни айтды. Чирик кёлню жагъасында былтырдан бери да кёп ашхана ачылгъанын айтдыла.

- Былтыр Батырны кафесинде ашагъан хычинлени татыуу сау жылны  эсимден кетмей тургъанды,-деди Алексей а.

Биз  келгенибизде,  Батыр да анда эди да, быланы танышдырдым, Алексей жыл сайын аны ашханасында хычинле ашар ючюн Пензадан келгенин айтдым. Новиковланы юйюрлери Черек районну бютюн бегирек нек сюйгенлерин  да ангыладым. Бир кезиуде  студент жашладан жыйын къуралып, чатырла алып, Уштулгъа солургъа кетип къалыучу эдик. Алексей да бизни бла бирге. Экибизге бир жол 101 маршрутда тау артына солургъа баргъан турист къауумну ыфчыкъдан ётдюрюрге тюшдю. Артда  аны  юй бийчеси боллукъ Татьяна бла анда танышхан эдиле ала. Аны ючюндю тауларыбызгъа, ашыбызгъа да сюймекликлери. Татьяна бу жол хычинле этерге юйрениригини юсюнден да айтды