«Адамны сыфатын бютюн ариу эталсам, кёлленеме, къууанама»

Косметология массажны къаллай энчиликлери болгъаныны юсюнден ол жаны бла ишлеген Гузойланы Алима бла ушакъ этгенбиз.

- Юйреннген къайда этгенсе массажны бу тюрлюсюне? Бизни республикада аны бла байламлы билим берген специалистле кёпмюдюле?

-  Бюгюнлюкде мында да бардыла ол жаны бла юйретгенле, алай кёп тюйюлдюле. Мен Дагъыстанда окъугъанма, нек дегенде ариулукъ жаны бла анда тыш къыраллада юйренип келген терен билимли специалистле бардыла, ангылатхан да ала иги этедиле. 

-  Хар усталыкъны да кесини энчилиги барды, сени оюмунга кёре, массаж этгенде эм къыйын не зат болады?

- Бу ишде манга къыйын жангыз бир зат болады – келген къызла сени айтханынгы эшитмеселе. Бир-бирле, жарсыугъа, жангыз массаж бла кеслерин ариу болуп къалаллыкъ сунадыла, айтханынга уллу эс бурмайдыла. Эм алгъа массажгъа, бютюнда аланы быллай тюрлюсюне, келирден алгъа эки сагъатны ашаргъа жарамайды, алай болмаса, массаж этген кезиуде аны кёлю аман этерге болады. Сора процедурадан сора да бир-эки сагъатны адам кесин ашдан сакъласа, хайыры игирек болады.

- Быллай массажны хайырындан бир айгъа ненча килограмм ауурлукъ кетерге боллукъду?

- Бир айны ичинде хар затны да айтханымча этип турсала, беш-сегиз килограммны азайтыргъа къыйын тюйюлдю, аны бла бирге уа белинден да сегиз сантиметр чакълы кетерге боллукъду. Алай, айтханымча, адам жангыз массажгъа ышанып, ингирде уа аямагъанлай, ауур азыкъла ашап, неда бусагъада кёпле сюйген, саулукъгъа хата келтирген татлы газ сууланы ичип турса, андан магъана болмайды. Неда ол айны ичинде кетген килограммлары экинчи айда бек терк къайтып къаладыла. Аны ючюн адам, эм алгъа, кеси сакъ болургъа керекди аллай энчиликлеге.

Ол адамны терисине бютюнда къыйын болады. Массажны хайыры бла ол тап халгъа келе тургъанлай, ашха ычхынып къалса, алгъадан эсе бек семирирге да болады. 

- Массаж этген бек арытады дейдиле, алаймыды?

- Бир кюннге беш-алты къызны алама, къыйналгъан да этмейме. Арыгъанла да бола болурла, алай мен адамгъа массаж этип, сыфатын ариу эталлыгъыма къууаннган, кёлленнген этеме. Амалым болса эди, хар тиширыуну да санын ариу этерге сюерик эдим. Аны себепли хар келгеннге да хайыр эталгъанымы ангыласам, арыгъан угъай, къууаннган этеме.

- Алима, хар тиширыу да ариу болургъа сюе болур, алай саулукъ  жаны  бла  бу  массажны  этмезге сылтаула уа  бармыдыла?

- Хау, жарсыугъа, аллай энчилиги да барды. Аягъында тамырлары, жюреги къыйнагъан, сора онкологиясы болгъан адамлагъа жарамайды. Сора келгенни къан басымы уллуму, огъесе гитчеми болады, ол энчиликге да массаж этерни аллында эс бурмагъанлай жарамайды. Массаж анга кёре эки тюрлю этиледи. Сора териде ёсген сепкилле бла да сакъ болургъа керекди, ала уллу болсала, аланы юслеринден басаргъа жарамайды. Белгилисича, массажда тюрлю-тюрлю аппаратла бла хайырланама. Аланы да кеслерини энчиликлери барды, жюрек ауруулары болгъан адамлагъа аллайла келишмейдиле.

- Бир-бирлеге тынгыласанг, массаждан сора къыйналгъанларын айтадыла. Ол алай болургъа керекмиди?

- Угъай, массажны къаллай тюрлюсю да адамны саулугъуна хайыр келтирир ючюн этиледи. Массаж этген кезиуде хау билинеди, алай андан сора уа, санынг тюйюлгенча угъай, спорт залда тренировка этгенча, шаугютлеринг алай билдирирге керекдиле. Бек къаты басып, этни къаралтхан, неда асыры ийлегенден, жара этген массаж болмайды.

- Массаж этгенде бал бла да хайырланаса, андан сора да, исси эм сууукъ чулгъаныу барды. Ала не хайыр бередиле эмда энчиликлери недеди?

- Массажны бу тюрлюсюнде бал бек кереклиди. Курсну ичинде бал бла юч кере массаж этилсе, ол терини ариу этеди. Сора целлюлитни да кетерирге иги болушады, саулукъгъа да хайыры уллуду.

Исси чулгъаныуну энчилиги уа, ол терини тюбюнде жауну эритирге иги болушады. Терини тюбюнде жау массаж бла иги кетмесе, аны бла хайырланама. Ол а иги эритеди, аны себепли тиширыуну бели да иничкерек  болады. Сора сууукъ чулгъаныу а, иссича, жауну кетергенинден сора да, терини ариу эм сыйдам этеди. Андан сора да, аллай маскаланы тюрлюлери  асламдыла, ала бла да аз-аздан хайырланыргъа сюеме.

 - Быллай массажгъа барыргъа сюйген тиширыулагъа не айтыргъа сюесе?

- Эм алгъа массажист айтхан эсгертиулени этигиз. Ол сизни саулугъугъузгъа иги себеплик боллукъду. Ары жюрюрге сюйгенлеге, сюймегенлеге да айтырыгъым, ашыгъызгъа сакъ болугъуз. Адамны сыфаты, териси да ашны тюз ашамагъанындан бузулады, теркирек къартаяды. 

Бютюнда шёндюгю татлыладан хайырдан эсе хата кёбюрек болады. Аны ючюн адам ашындан аланы кетерип къойса, бютюн иги боллукъду. Дагъыда, огъарыда сагъыннганымча, газы болгъан татлы суула адамны сыфатын бек бузгъанларын эсде тутсала сюеме. Хар адам да саулукълу болсун.